Tettidir ussan-a ineggura taddart n la Crête-Rouge neɣ Tawrirt tazeggaɣt deg tɣiwant n Leɛǧiba yiwet n teswiɛt qessiḥen anda ixusṣen waman n tissit. D ayen yeǧǧan imezdaɣ-is ad refden yiwet n ucekti ɣer yimḍebbren ɛlayen n tmurt, imi deg yiwet n tebrat i yuran i uneɣlaf amenzu Abdelmalek Sellal ssutren deg-s ad d-yefk yiwen n lamer i usiweḍ n waman n ubaraǧ n Tilesdit ɣer taddart-a. Iwulem ad d-nesmekti dakken lɣiḍ n yimezdaɣ-a iban-d mi akken bdan waman ttxaṣṣan yal tikkelt almi wwḍen ttasen-d tikkelt deg xemsa n wussan. Taluft yernan reffu deg yimdanen mi akken tiwilayin tiǧiratin akked temnaḍin nniḍen sfaydant seg waman-a ḥala taddart-a xas akken tebɛed kan seg ubaraǧ-a s wazal n yiwen n ukilumitr. «D ayen ur nessaweḍ ara ad t-nefhem, imi wid ibeɛden wwḍen-ten waman seg Tlesdit, nekni yellan ɣef rrif-is yenɣa-aɣ fad.” I d-yenna Abdelghani.B, yiwen seg yiɛeggalen n tesqamut i yettwabedden ɣef ddemma n unadi n tifrat n u$qbel-a n waman.
Ɣef leḥsab n yisallen i aɣ-d-yewwḍen, taggara n yimalas yezrin yerza-d yimḍebber n Dayra n Beclul akked uselway n tɣiwant n Leɛǧiba ɣer taddart-a anda walan dakken lbir i d-yettakken aman n tissit yezder s waṭas ayen i t-yeǧǧan ur d-yessalay ara alamma ɛeddan kra n wussan iwakken ad d-yeččar. D ayen i yeǧǧan taddart-a ur tsess ara yal ass.
Ɣer taggara, ɣef leḥsab n yimeslayen n yimezdaɣ n Tewrirt Tazeggaɣt, “asiweḍ n waman seg ubaraǧ yettuḥettem ass-a, ur nezmir ad nerǧu nnig n waya, imi d awezɣi yiwen n lbir yecban wa ad yessiweḍ ad yessew azal n 2500 n yimezdaɣ. Rnu, ur d-nessuter ara lmuḥal, nebɣa kan ad nili am nekni am medden.”
Smail. M