Aɣbel-a, yeḍra-d di taddart n Teslent i d-yezgan deg Yilulen n usammer di tama n Uqbu , imi lḥir n useḥbiber ɣef twennaḍt d ugama taggara-agi, yuzzel wawal fell-as aṭas di tmurt n Leqbayel.
Lemḍara-s, tebda tettawweḍ ɣer tezmert n yimezdaɣ , dayen yeǧǧan imezdaɣ n Teslent ad d-heggin lḥemlat n usizdeg n yizenqan d tliwa d temqabrin n yiderma n taddart .”Di yal taggara n ddurt, tettilid tcemlit d lufeq i d-ttheggin kra yilmeẓyen i iḥemlen agam’’, i d-yenna Amar Madawi, ameddakkel n ugama. Simal zerrin wussan , simal yettzad lebɣi , simal rennun-d lɣaci i itekkin di lḥemla n tezdeg i d-yettilin deg wass n lǧemɛa.
I wakken ad d-yili uselḥu n leḥmla –agi akked useddu n yiɣeblan n yimezdaɣ s utekki d lemcawra, sbedden Wat Teslent tajmaɛt n lɛuqqal am wakken xedmen lejdud-nsen zik-nni. Syin akin, sullin-d tiseqquma: tin n twennaḍt , tin n yiɣeblan n tmetti akked d tin n waddal . ‘’Armi i d-tuɣal tejmaɛt n taddart i nemyaɛqal d atmaten s At Teslent. Wama zik, bḍan-aɣ yikabaren n tsertit d tdulkiwin tunṣibin, almi tfuk twizi gar yimezdaɣ ,dɣa ula d iḍuman, zin-aɣ-d s ya u sya’’, I d-yenna Ali Teslent, yiwen yilemẓi i iqedcen ɣef taddart. Ayen ara d-ijebden lwelha n win ara yerzun ɣer teslent d ttawilat xedmen i yiḍuman: yal ssenf n yiḍuman yers weḥd-s, deg umekkan-is. Ɣef wakken i aɣ-d-nnan yiɛeggalen n taddart , deg wussan i d-teddun, ad tkemmel lḥemla n useɛlem ula ɣer tlawin n taddart. Ad d-ilin yisaragen ideg ara ḥedrent ula d nutenti , imi tezdeg tbeddud deg uxxam, d tameṭṭut i d lsas. ‘’Nessaram tudrin n udewwar n Yiɣram, ad d-ɛandent , iswi nneɣ d tezdeg n udewwar, isaffen-is, tiliwa-s ,akked tzegwa-s. Aya, ad yili ahat, ad yejbed lwelha n yimḍebbren n tmurt-agi, ad seftin deg uḥric n tmerrit’’, i- yenna Dda Lmaǧid At Gana, d leɛqel n taddart deg wawal-is .
Brahim Benhamouche