I lmend n usmekti n umulli wis mraw (10) n tmenɣiwt n Aissat Rabah, deg 12 tuber 2006 , tella-d tezrigt tis 4 n temsizzelt ‘’Aissat Rabah n taddart tazeddgant n lwilaya n Tizi Uzzu’’.
Ɣef waya, anemhal n twennaḍt, Mass Messella Mohamed , yemmeslay-d amek i d-tella temsizzelt-agi. Aseggas ummid, nutni ttruḥun ad d-walin tuddar yettekkin. yYewweḍ umḍan n tudrin i ixedmen timsizzelt-agi ɣer 73, aseggas-agi. Ma deg useggas n 2013 llant 39. Yettili-d usizdeg ama deg yiberdan, tiliwa, d tajmeɛt, lemqamat , lebni n yixxamen n yilmeẓyen , timkerḍiyin d waṭas nniḍen. Cebḥen –tent s yijeğğigen , sbiɣa. Lxedma –agi n tezdeg deg yal taddart, xedmen-tt s tcemliyin , d axeddim igerrzen n yilmeẓyen , iḍefren abrid i d-ğğan lejdud. Timsizzelt-agi, texleq-d tismin gar tuddar anta ara d-yufraren d tamezwarut . Ayagi, d ayen yesefrahen imi tismin ɣef tezdeg d uɛaned , d useḥbiber ɣef twennaḍt, rnu ɣer waya, tafulki n tuddar n leqbayel, cebḥent seg zik. Maca s uwennaɛ d ureqqaɛ-nsent, kemmlent ccbaḥa. Anemhal n twennaḍt yenna-d dakken yewɛer akken ad textireḍ anta i izeddigen imi 73 d tid yettekin, 25 d tid ixedmen ayen iwumi zemrent akken iwata , maca seddis kan i d-yufraren. Drus , gar tuddar-agi i d-yufraren, ad naf tamezwarut d taddart n Boumessaoud deg tɣiwant n Imsouhal , deg Iferhounen, taddart tis snat Aourir ouzemmour deg tɣiwant n Akbil, Ain El Hemmam, taddart tis kradet taddart n Bouaouen n Idjer, tis ukkuẓet taddart At Adella deg Abi Youcef n Michli, tis semmuset taddart n Boudjellil n Irdjen, tis seddiset d taddart n Ait Izid deg Souk Letnin Aneɣlaf n tezdeg n twennaḍt i iḥedren i tikci n warazen deg uxxam n yidles Mouloud Mammeri ass n umhad, 13 deg tuber 2016, netta seg tama-s, yefka i taddart tamenzut i d-yufraren, Boumessaoud, 10 n yimelyunen n yidinaren, semmuset i d-yegran daɣen, wwint amur-nsent. Aṭas i d-yusan ad walin , ama d tidukkliwin, ama d imdebbren n tɣiwanin d tudrin. Yerna aneɣlaf n tezdeg n twennaḍt iṛeggem-asen belli iseggasen i d-iteddun mačči kan seddiset n tudrin , s kra n tin ara yettekin ad tesɛu arraz , ɣef leɛtab ittɛattiben, abeɛda ilmeẓyen. Ayagi d ayen yessefraḥen s temsizzliyin yecban tigi , ma qqiment zeddigit tudrin, ur neḥwağ ara timdinin , ilaq ad neseḥbiber ɣef ugerruj i nla ( nesɛa), akken ad nhader tawennaḍt ur ttnesebluluɣ ara.
Zakia Ben yahia