Am yal amenzu n wayyur n wunbir, tamurt n lezzayer , tessmektay-d Tagrawla n 1954. Seg wass-nni ar ass-a, 62 n yiseggasen segmi i d-kkren Yizzayriyen akken ad qablen acengu amesbaṭli i yebɣan ad yesteɛmer tamaurt, ama s yidles –nsen ama s tutlayt –nsen.
Ulac acu ur xdimen deg lejdud-nneɣ: nɣan, tilawi, irgazen akkedd yigerdan ; serɣen iɣerbazen, xedmen ayen ur yezmir yiwen ad yettu. Usan-d ad aɣ-fakken, ad aɣ-snegren. Maca, imir banen-d yirgazen i tesɛa tmurt n Lezzayer myuṭṭafen afus deg ufus s tebɣest, d tiḥerci , banen-d belli deg teswiɛt n ddiq, Izzayriyen, ttuɣalen d yiwen : d agdud ur nqebbel ara lbaṭel ; ur nettsusum ara i wayen yebɣa Uṛumi ad t-yexdem. D amezruy i yellan d inigi i wayen yuɣen Izzayriyen. Yerna ar ass-a, mazal wid i d-yecfan, llan imir d imjuhad, menɛen seg yir ifassen. Mi ara d-ḥekkun, d ayen ur iqebbel leɛqel ɣef wayen srewten Yiṛumyen deg yizzayriyen. Mazal later-nsen ar ass-a n wussan. I lmend n usmekti n tegrawla n 54, yal tama n tmrut n leqbayel , yal taddart, ad ruḥen ɣer yisebdaden( monuments) akken ad sersen ijeğğigen , ad sterḥmen ɣef lerwaḥ n cuhada. Dɣa, deg taddart n texliğt At Ʃattu deg Micli ad xedmen asebdad s yisem n umeɣras Si Lḥafiḍ Yaḥa yewḍen leɛfu n Rebbi kra n wayyuren aya. Deg taddart At laɛziz, yal aseggas mi ara yekcem umenzu n wunbir kkaten lbarud. Deg tɣiwanin-nniḍen, am Yiɣil Imula deg Waḍiyen, tettaččar taddart-nni imi dinna llan aṭas n wallalen i d-yesmektayen ṭṭrad, ttasen-d seg Wat Yanni, ttawin-d inelmaden akken ad walin later n yiṛumyen. Amenzu n wunbir 1954, ulac win i izemren ad t-yettu. Ad yerḥem Rebbi imeɣrasen n tegrawla. Ad d-nebder kra deg-sen : Abane Ramdane, Ḥassiba Ben Bouali , Mustapha Ben Boulaid, Krim Belkacem, Amirouche Ait Hamouda, Abderrehman Mira , Si Lhouas d waṭas-nniḍen, mačči d yiwen ad t-id nebder.
Zakia Ben yahia