Yella ddurt iɛeddan umedyaz-amsuqel Buɛlam Messusi d inebgi n Tdukkla Azday Adelsan n Uweqqas i t-id-inecden i yiwen n usarag s wazal-is ɣef umaḍal n usezgi (adaptation). Mi d-teḥḍer tegnit, yemmeslay-d umsureg ɣef yidlisen i d-yessufeɣ d umezruy n tneqqisin yecban Kalila d Dimna, syin yefka-d kra n yiwellihen ɣef wamek suqulen, neɣ sezgayen, aḍris neɣ tamacahut sdat n kra n medden. Ɣas drus yid-sen, maca ffuden s tidet i usenf-a n temliliyin. Kra n wakud, yessawal-d Mass Buɛlam kra n tneqqisin i wid iḥeḍren, am tinna Uccen d Yizimer, almi i ten-yewwi ɣer ddunit-nni n uḥezzeb. Dɣa, yeɛjeb-asen lḥal merra. Ɣer taggara n usarag, yella-d yiwen uskasi yelhan anda i d-llan yisteqsiyen i bab n yidlisen d tmuɣliwin ɣef wayen akk icudden ɣer tira. D acu, sḥassfen yimeḥḍar imi ur d-telli temlilit n ubuddu n yidlisen n umsuɣel. Ɣef waya yenna-aɣ-d win i terza taluft: «ssawleɣ i umaẓrag maca ur d-yewwi kra. Ma d timlilit, tgerrez ayendin ɣas ur d-yusi ara waṭas. Ilaq kan, ad gtent ugar deg tmurt n Yizwawen». Ugur-a n yir aqeyyem n temliliyin tidelsanin, iɛumm deg yal tama ɣur-neɣ. Imi, deg ta n Uweqqas, ssawlen yimheggiyen i yiselmaden merra, maca ala yiwen i yellan di ttiɛad, rnu d aɣrib! Yessufeɣ-d ar tura Buɛlam Messusi kraḍ n yidlisen, akk-nsen, cudden i warrac, d asezgi neɣ d asuqel ɣer tmaziɣt. Amezwaru d kra n tneqqisen i d-yeffɣen s tallet n HCA deg 2004. Syin, yerna-d Kalila d Dimna d uḥric-nniḍen n tneqqisin tigreɣlanin.
Mhenni Khalifi