Nnan Wat zik : ‘’win yebɣan ad yegmu, yilqiq, win yebɣan ad yuzur, yirqiq, win yebɣan ad yidir, yemmet’’.
Diɣ, netta armi i yemmut Kheloui i d-iban wazal yesɛa akked wayen i d-yefka i ccna aqbayli. Ass-nni n temḍelt-is, mačči d izli n lɣaci i d-yeqqersen ɣer taddart-is, Taddart tameqqrant, deg tama n Yiḥesnawen, i wakken ad ḥeḍren i lǧanaza-s. Aṭas n yinaẓuren i d-yusan ad t-walin i tikkelt taneggarut gar-asen : Ait Menguellet, Taleb Tahar, Rabah Ouferhat, Yasmina, Takfarinas, Dahmani Belaid, Mohamed Chemoun, Hacène Ahrès, Ali Meziane, Youcef Guerbas…atg. Uqbel ad t-id-awin ɣer taddart-is i wakken ad yemḍel deg wakal n lejdud-is, yuɣ lḥal tessens fell-as twacult-is lexwan deg uxxam-is i yellan deg temdint n Tizi Uzzu. Asmi yemmut, diɣ, wwin-t ɣer uxxam n yidles Mulud Mɛemmri anda i t-walan medden. Yella Kheloui Lounes, yuḍen aṭas-aya. Acu kan ussan-agi ineggura yenṭer u yekcem acḥal n tikal ɣer sbiter. Yekcem i tikkelt tamezwarut ɣer sbiṭer n Sanatorium n temdint n Tizi Uzzu anda i yettdawi lehlak n turin (la fibrose), yekka deg-s kra n wussan, syin fkan-as-d ttesriḥ. Acu kan ur iɛeṭṭel ara yuɣal ɣer sbiṭer n Tizi Uzzu imi yenṭer mliḥ. Xas ula akken yeqqaz deg-s lehlak, meɛna yal win ara yerzun ɣur-s, ad as-d-yemmeslay ɣef ccna akked album i d-yettaheggi. ‘’Asirem-iw d akken ad d-yeffeɣ deg ussan-agi album-agi i ttheggiɣ u ad cnuɣ tameɣra-w taneggarut deg Tizi Uzzu.’’ D wigi i d awalen i d-yenna i uɣmis La Dépêche asmi yerza ɣur-s ɣer sbiṭer n Sanatorium. Acu kan ddunit d mm leɣrur, akken qqaren, ur t-teǧǧi ara ad yaweḍ asirem-is wis sin. Meɛna, yewweḍ asirem amezwaru imi isellek asekles n 14 n tezlatin ass-nni 20 deg tuber iɛeddan. Yeggmen ad d-yessuffeɣ album-agi deg taggara n unbir i deg-i nella. Am wakken yeḥsa ad yemmet deg ussan-agi, ad as-tiniḍ yettciri. Yefka azwel ‘’Bqa ala xir a ddunit’’ i yiwet gar tezlatin-is-agi tineggura. Aṭas i yessḥassef Kheloui Lounes imi ur as-ffkin ara azal iwulmen dagi deg tmurt am wakken i t-yesɛa deg tmura tiberraniyin. Yemmut Kheloui deg leɛmer-is 66 n yiseggasen.
Steɛfu deg talwit a Ccix.
Hocine.Moula