Mbeɛd setta n yiseggasen, yuɣal-d ucennay mmi-s n At Mlikec Ḥakim Gawa s umaynut deg umaḍal n uẓawan d wawal. Ayen nezmer ad d-nini ɣef yiseɣrez-a (album) iwumu yefka azwel « A tayri », d akken inuḥ deg-s aṭas n wayen yeɛnan timetti : ama d tilufa n tudert, n umdan deg ddunit neɣ d tayri. 6 n tezlatin iwumi nezmer ad nettḥesses, yal yiwet s uẓawan-is, imeslayen-is, d yiḥulfan-is. Ula d allalen, lqidar i yettwasqedcen deg-s. Llant dɣa seg umaynut-n « A tayri ttxil-m », « D acu i d-mazal », « Lehlak », « Yiwwas », « Lewṭar », akked tneggarut « A Rebbi ». Ɣef wawal n unaẓur i teɛna taluft, i d-yessufɣen ar tura rebɛa n yiḍebsiyen deg umecwar-is n ccna, ma yella iɛeṭṭel seg 2010 armi d aseggas-a akken ad d-yawi ajdid, d ddunit kan i t-yeǧǧan ad yexdem kra kra war ma yesseɣseb lecɣal i d-yessuturen ayendin d ttawil. Ɣas ma yesɛa tiẓrigin d ayla-s, maca uguren i d-yettmaggar ur mxalafen ɣef wid n yinaẓuren merra n tmurt. Imi i d-yenna ur iwala d acu yexdem uxxam n yizerfan n umeskar, ma yella asebɣes yettili-d i kra, wiyaḍ xaṭi. Amaynut-a, ihi, tzemrem ad t-tafem deg yimeḍqan anda ttnuzun yiseɣraz (albums). Tella kan yiwet n taluft i ilaq ad d-nerr awellih fell-as: tagi d tira ur newqim n yizwal n tezlatin. Lemmer yal win yebɣan ad d-yessufeɣ, ad icawer win iẓewren deg tjerrumt tamaziɣt, tili iḍebsiyen akk ad rnun ccbaḥa ugar ma ttwarun akken yessefk s tutlayt n Lmulud At Mɛemmer.
Mhenni Khalifi