Mbeɛd mi d-tella temlilit n twilayt ɣef waman, taggara n ddurt yezrin Mouloud Cherifi, s yisem-is d lwali n Tubiret yessemlal-d inemhalen d yiɛeggalen n usqamu n twilayt I wakken ad d-gren s annar tamsalt n lebni d tnezduɣt. Di tazwara, d anemhal n uḥric-a d-yewwin agzul ɣef wayen yettwaxedmen deg yiseggasen yezrin, d wayen yetturajun ɣer sdat. Asmi yekfa awal-is, imḍebber amenzu n twilayt yuɣal-d ɣer yiɛewwiqen yellan I wakken ad iẓer ssebba yeǧǧan aṭas n yisenfar gellen acḥal d aseggas. D tinezduɣin, s ṣṣenf yemxallafen iɣef yezzi aṭas wawal, anda i d-iban uɛeṭṭel ameqran deg lebni-nsent. Ɣas ulamma ddeqs i yettwabnan, yettwaferqen, maca ayen i d-yeqqimen s wazal-is ! D ayen yeswahmen mačči d kra Mass Cherifi i yefkan iwellihen i wakken ad d-yili uɣsab deg useddu n lecɣal. Di yal tikkelt, yettuɣal-d wawal ɣef yimɛelmen i yesɛeṭṭlen deg yisenfaren, imi ssuturen-d tadrimt di yal tikkelt. Dɣa, lwali yessuter seg unemhal n uḥric-a i wakken ad iẓer imɛellmen-a anda ara ten-yethedden ɣef unekcum n tedrimt s asenduq n twilayt mebla leɛḍil. Yeqqim-d yiwen n usenfar deg temdint n Sour El Ghozlane, asmi kan yesla lwali d acu n ssebba yesɛeṭṭlen beddu n lecɣal, yerfa mačči d kra, imi d kra n ttawilat n uxeddim i yeǧǧa yiwen n umɛellem deg umkan-nni i d ssebba. Iwelleh s leqseḥ imḍebber n uḥric-a n lebni d tnezduɣt i wakken ad d-iheggi amkan-nni s lɛejlan. Timlilit, tekfa s waṭas n yiwellihen ara yeǧǧen aḥric-agi ad tekfu fell-as tuzzya d tunḍa, imi Mouloud Cherifi yebda yessekfal-d s kra d asenfar yuɣalen d rrif.
Smail. M