Tanaẓurt-nneɣ Aldjia, tettwassen d lal n uḥulfu, d mm taɣect i d-ineṭṭqen awal s rruḥ. Ɣas d tin iḥemmlen awal deg tezlit aṭas, maca temmeslay-d deg tdiwennit-a ɣef kra n temsal. Gar-asent aḍebsi-ines amaynut i d-iteddun.
Aɣmis n Yimaziɣen: amek tettili Aldjia akked tẓuri?
Aldjia: nekk d tẓuri akken i aɣ-mazal neddukkul kan. Tugi ad iyi-tebru, nekk ur zmireɣ ad tt-ǧǧeɣ. Ufiɣ iman-iw aṭas ɣur-s ɣas xedmeɣ d yimedyazen i tt-yettcebbiḥen.
Tɛeddaḍ deg ustudyu, mmeslay-aɣ-d ɣef umaynut-a i d-tettheggiḍ?
Aseggas-a, mi kecmeɣ ɣer ustudyu, xedmeɣ s leɛqel-iw imi ttruḥuɣ, ttuɣaleɣ gar Paris d Tmurt. Ur zmireɣ ad qqimeɣ di tmurt nnig 30 n wussan. Tazwara d tayemmat. Deg-s ṭam (8) n tezlatin s yisental yemxalafen. Snat n tezlatin d timaynutin, d tijmilin i Meɛtub Lwennas d Muḥya. Yiwet n tezlit en duo avec Slimani, d afennan aqbur. Ad as-iniɣ tanemmirt d tameqqrant, ad yesseɣzef Rebbi di leɛmer-ines, di tezmert d talwit. Lhiɣ d tezlatin n yiseɣrez, ladɣa snat iwumi ɛawdeɣ, bedleɣ deg-sent asentel.
I melmi ara d-yeffeɣ ɣer ssuq?
Tura yewjed. Ufiɣ amaẓrag, nemsefham, ad t-id yessufeɣ akken iwata. Ayen-nniḍen ɣef yiseɣrez, ad t-teẓrem di unbir mi ara d-yeffeɣ.
Nessen-ikem tcennuḍ aṭas ɣef lmeḥna n tmeṭṭut. D acu i d awal-im ɣef wannect-a?
Tazwara, nekk d tameṭṭut, ẓriɣ d acu d lḥala-nteɣ. Ẓriɣ i tettidir tmeṭṭut, ladɣa taqbaylit. Ala nettat i yeẓran lḥala-s, ala nattat i ara yecnun ayen ttḥusunt tid i tt-yecban, d wayen ttidirent. Nekk skud d tameṭṭut i lliɣ, d nekk i ara iḥudden ɣef yizerfan-iw. Ala tameṭṭut i yettnaḍahen ɣef wayen icudden ɣer tmeddurt-is. Ala nettat i teɛna temsalt. Qqaren » Ur yeqriḥ ḥedd usennan ala aḍar i yeddan ḥafi ».
Telḥiḍ-d amecwar ɣezzif deg wannar n ccna. Ar tura, tettuqenɛeḍ s wayen akk i d-tefkiḍ i tezlit tazwawt?
Bdiɣ ccna d terbaɛt n Djurdjura deg useggaz n 79. Ur qqimeɣ aṭas yid-s, imi tella-yi kan d tazwara n tikli akken ad tt-semmdeɣ, acku nekk bɣiɣ ad cnuɣ weḥd-i. Qedceɣ aṭas d Fahem Muḥ Sɛid, Ayt Meslayen, ad yesgunfu di talwit, Ayt Mengellat. Daɣen, lḥiɣ-d amecwar i yiman-iw. Anaẓur, d acu i d-yefka, ad d-yini ur d-fkiɣ ara. Yal mi ara d-nefk, mazal nebɣa ad d-nernu ugar. D awezɣi anaẓur ad yeɛyu deg wayen i d-yefka, dima ad yeqqar urɛad ssawḍeɣ, mazal ur d-nniɣ kullec, mazal yella wayen ixussen. Llan kan kra n wid i iḥemmlen ad ttzuxxun, wid i izemren ad ḥettben wḍen. 30 n yiseggasen segmi bdiɣ ccna, werɛad qennɛeɣ iman-iw deg wayen i d-bdiɣ. Ḥemmleɣ ad cnuɣ, ḥemmleɣ Taqbaylit, cniɣ mazal ad cnuɣ, nniɣ-d mazal ad d-iniɣ.
Kra n ttiɛadat n ccna ɣer sdat?
Akken ad yewjed umaynut, ad nettheggi wayeḍ. Ttaruɣ isental, sxerbiceɣ akken zemreɣ. Ttawiɣ-d ɣer wid ixeddmen tamedyazt, sɣur yinaẓuren i yettarun Taqbaylit . Deg yiseɣrez-a aneggaru, d leqdic n terbaɛt akked kra n medden. Ur ttwacqiɣ ara ad t-id-iniɣ, yal yiwen d acu i d-yefka d aẓawan, neɣ d imeslayen. Fkiɣ leqdic i waṭas n yimdanen.
Tanemmirt ɣef wayen akk i d-terriḍ. D acu tebɣiḍ ad t-id-ternuḍ?
Ad d-iniɣ azul d ameqqran i wid yeqqaren aɣmis-agi s teqbaylit, d wid i t-yettarun i as-yettakken afud. Tanemmirt-im a Kaisa imi i yi-d-tefkiḍ isteqsiyen. Ǧǧiɣ-am lehna d talwit.
Testeqsa-tt: Kaisa Khalifi