Akken ifukk asefru-s, taqcict tuɣwas tebda a tnehhi d lweqt ad terbu. Iffeɣ umedyaz, tessawel yema-s i tlawin ad tt-εiwnent di rebbu n yelli-s. Mi d-ikcem urgaz-is tameddit yufa, yerna ɣer-s uqcic, tameṭṭut-is ur tt-yuɣ wara. Argaz iwhem deg wayen ittwali. Mi isteqsa amek akka! Taḍeggalt-is terra-as-id: d leflani iwumi d-nessawel, iwala-tt kan dɣa Rebbi ifka-d liser.
Akken ifukk wagur inna-as urgaz-nni i tmeṭṭut-is: issefk, ad neg imensi, ad d-neεreḍ amedyaz ɣer yimensi, yuklal.
Terra-as tmeṭṭut-is: anef i umedyaz deg umkan-is, ad aɣ-imneε Rebbi si ddnub-is !
-Ala a tameṭṭut! Wellah ad yečč d imensi ɣur-neɣ!
-ḍebber aqeṛṛu-k!
Netta iffeɣ ɣer ssuq ɣer lqeḍyen, nettat teffeɣ ɣer tala ad d-tagem aman. Mi d-tuɣal si tala, tɛedda-d ɣef tejmaεt tufa-d amedyaz-nni, iqqim ɣef udekkan, aqerru-s gar yifassen-is. Mi tewwet ad tɛeddi isḍfer-as-d asefru, yenna-as:
Lεeslama-m si tala
Leεyun n tnila
Taṭṭucin bḥal leḥcic
Ḥemdulleh mi teḥliḍ
Mebruk
Nseεdam aqcic
Yusa-d urgaz-is si ssuq, teftel seksu, teseww aksum i yimensi. Alammi d lawan deg ara yečč imensi inna-as urgaz-is heggi-d imensi. Tameṭṭut tessers-d tlata n tbaqyin n seksu d uksum, tenna-as: a ta-n dayen ihegga yimensi. Argaz iddem-d tacekkart n ssem ismer kra di ttneṣfa n yiwet n tbaqit inna-as i tmeṭṭut-is : anef-asent i tbaqyin-agi, akken llant. Tura ad ṛuḥeɣ ad d-siwleɣ i leflani. Argaz iruḥ ɣer tejmaεt issawel-d i umedyaz. Akken d-ččuren tawwurt, argaz izwar-d, amedyaz deffir-s, tbedd tmeṭṭut-is tenna i urgaz-is: ay argaz di leεnaya-k ma ur iyi-teǧǧiḍ ad d-awiɣ asefru!
Yenna-as urgaz-is : ad yeg Rebbi teččiḍ aqerru-m ! Ini-d.
Tenna-as:
Ttxilek a lbaz meẓẓiyen
A win itεeffan
Ruḥ asif, enz-as ɣef rrif
D lεibad i d imcummen
ewwlen ad k-ɣedren
Ɣef zwaj-is ḥed ur t-iṭṭif
Amedyaz ifhem lmeεna n usefru yerra-as:
A ta-n, a yelli-s ujeḥmum
Azegzaw n ṛṛqem
Ẓẓriɣ asigna-s tekkat
Qqimen ad ččen, amedyaz iddem snat n tleqmatin si rrif n tbaqit issers taɣenjawt inna ḥemdulleh. S wakka imne&epsilon,; ur t-yuɣ wara.
Ramdane Lasheb