Win ara yerzun ɣer Wasif n Ssumam di lwilaya n Bgayet, ad yewhem deg liḥala-s anda tewweḍ: yuɣal akk d agudu , d imerjan akked uɣebbar. Rnu iḍumman akked yizuliɣen i d-ittefɣen deg luzinat yal ass, zzin-as-d s ya u s ya.
Asif-nni yellan zik yeṭṭefeggiḍ seg waman zeddigen, yuɣal d targa imejriwen. Rmel-nni, yettaṭṭafen aman yettṣefiten, irennun ɣer laɛwansar yellan Ddaw n tmurt ’’la nappe ’’ ineqqes seg wass ɣer wass . Ma d timental banent. Imdanen i yettdeggiren iḍumman-nsen ɣur-s akked d tkubaniyin yemxalafen, xas akken lqanun yemnaɛ anect-a. Ayen i as-yeqqimen i wassif, kemlent-tt, deg yiseggasen-agi ineggura, lewzayen yessafayen rmel akked d tkubaniyin n yimɛelmen n tmurt akked d tbarraniyin, ladɣa, tid n Cinwa yestukkelfen s lxedma n ubrid ara icudden Bgayet ɣer ubrid ameqqran yellan deg Uḥnif di Tubiret. Qqazent imdunen i wakken ad d-jemɛent rmel d udɣaɣ ara seqdacent deg lecɣalat n ubrid. Atas n yimerjan i yeqqqimen akken ur ten-rbin ara , imi nutenti iswi-nsent awi-d kan ad fakent axeddim n ubrid deg lawan, i wakken ad awin adrim. Aɣbel n twennaḍt d ayen-nniḍen. Akken qqaren di lemtel “Ečč ay aɣyul, azekka ad nruḥ”, almi yuɣal akk wasif d imdunen . Win testeqsaḍ deg yimḍebbren terza temsalt, ad ak-yini lecɣalat ad kfun s lɛajlan , awi-d kan ad ifak ubrid-agi ara iccuden Bgayet ɣer ubrid ameqqran ara iruḥen seg usamer ɣer umalu n Lezzayer. Di temnaḍt n umalu n tɣiwant n Uqbu, di tama n uzaɣar , metwal At Ɛebbas, llan yimdunen d imeqqranen, ttawḍen alamma d 5 lmitrat di telqayt. Amdan neɣ aɣersiw ara yeɣlin ɣur-sen, ad as-yewɛer i wakken ad d-isellek iman -is.
B Benhamouche