Lehwa i d-yewten deg wussan-a ineggura tessazzel leḥmali mačči d kra, almi I d-ters yiwet n tugdi tazegzawt ɣef yimezdaɣ. Ur qqimen yiberdan, wala wurtiyen almi deg yiwet n teswiɛt tbeddel ṣṣifa n taddart. Iqudas ara yessufɣen aman, wid yerǧan acḥal aya asizdeg s-ɣur yimḍebbren n tɣiwant ttwattun maḍi, almi I d-jbant leḥmali. Zdat liḥala yecban ta, d imezdaɣ I ibegsen iwakken ad ssuzfen lḥif I ten-id-yennulen. Dɣa, d abrid-nni n tjaddit I yuɣen tasebḥit n wass n lǧemɛa yezrin iwakken, meẓẓi meqqer, myefken ttiɛad s abrid ara ssizedgen akked yiqudas yellan yakan reglen. S tidet, cɣel yecban wa ur yezmir ad yeǧǧ imdanen di rrif, imi yal amezdaɣ s wacu n ttawil I s-d-yusa. Lḥasun, ur tettafeḍ anda ara tgeḍ afus, imi imdanen amzun akken d yiwen n ufus, ṭṭfen amkan am tirni, wa yessekfal-d, wa yettara deg yidis. Ɣer tmeddit n wass, azniq ibeddel udem, s kra n wayen I d-tewwi lḥemla yettwakkes, yettwaḍegger. Ma d iqudas, ur d-yeqqim deg-sen uxeclaw ara iḥebsen aman ma yella tuɣal-d lehwa. D tamsirt I d-fkan yimezdaɣ n La Crête-Rouge, ur nekrif ara ifassen-nsen ad rǧun melmi ara ara d-tass nnuba-nsen, ma ran-d lwelha yimḍebbren ɣer liḥala ideg llan. D ayen dɣa I aɣ-d-nnan waṭas n yimezdaɣ I d-nemmuger lawan n usizdeg mi d-nnan:” Ayen akka I nxeddem mačči d ayen I d-nesnulfa. Seg zik I d-nufa imawlan-nneɣ ttadden amzun d yiwen n urgaz di lawan n ddiq. Lḥemlat I d-yennulen taddart-nneɣ glant-d s kra n usexreb ama deg ubrid ama deg urtiyen, maca ass-a neddukkel-d iwakken ad nekkes ayen iḍurren imezdaɣ d widen akk yettɛeddin s ya. Ur nezmir ad nerǧu imḍebbren n tɣiwant. Limer d lebɣi d nutni ara yilin d imezwura ɣer cɣel yecban wa, meɛna skud mazal tadukli d tegmat, ur yezmir ad aɣ-yerẓ lḥal.”
Smail. M