Asfugel n wass agraɣlan n yizerfan n ugrud

Partager

I lmend n usmekti n wass agraɣlan n ugrud , tiddukkla “Tafat” n taddart Awrir At Hesyun akked tiddukkla Ixulaf n Uqbu, heggant-d, taggara n ddurt–agi yezrin, sin wussan n uḥesses d useɛlem ɣef lemqadra n yizerfan n yigerdan i wass n 18 d 19 deg unbir 216. Leqdic, yella-d deg uxxam n yilmeẓyen n tɣiwant n Ukfadu. Ahil d amerkanti , llan deg-s yisaragen , timsikniyin , amezgun akked anecrah”clown”. Ass-nni amenzu n temlilit, yella-d beddu n tmeɣra s uledduy n temsikent ideg i d-ttwasnaɛten yimahilen ixedmen warrac d teqcicin. Atas n tugnatin i d-yettwaṭṭfen ɣef liḥala deg ttidiren yigerdan n ddunit s umata, ladɣa wid n tefriqet .” Di lawan-agi tura i nettmeslay akka deg Ukfadu ɣef yizerfan n yigerdan , atas n yigerdan i d-yesserwel akka ṭrad di tmura-nsen ɣer tmurt-nneɣ. Amedya: wid n Nnijer i d-yusan ɣer dagi ɣer lwilaya n Bgayet , atas deg-sen i yegganen ddaw n tqenṭyar war taduli neɣ učči yelhan deg ussan-agi n tegrest. Nessaram ad d-lhun yis-n yimdebbren n Yitri Azeggaɣ Azayri akked wid terza temsalt ”. Akka i d-yenna yiwen ubabat, allen-is ččurrent-d d imeṭṭawen. Ɣef lewhi n 10h30, yella-d umeslay gar kra n yimejjayen n tnefsit akked d kra n yimussnawen n lqanun d yimawlan, ɣef wamek ilaq ad yili uqadar n yizerfan n yigerdan. ‘’Iswi n temlilit-agi, d aqader n yizerfan n ugrud. Wamma iḍrisen banen si zman aqdim , ulac kan wid ara ad ten-iqadren. Di tilawt, ass-a aqlaɣ nettwali ttilint-d ttaɛdiyat ɣef lḥerma n yigerdan yal ass nebla akukru. Nessaram ad ifak waya di tmurt-nneɣ” i yettweṣṣi Mass Ziyad Djarrah s yisem-is d aselway n tiddukkla Ixulaf n uqbu. Deg wass wis-sin, ikemmel leqdic s tqufet i d-heggan i warrac. Ferqen-asen arrazen , lsan akk warrac d teqcicin tiqelmunin , xedmen ticraḍ s yiniten ɣef wudmawen-nsen. Tameddit n was, tekfa tmeɣra s ccḍeḥ , d unecraḥ. Nessaram, ad ifak zzur ɣef yigerdan anda ma llan deg umaḍal.

Brahim benhamouche

Partager