S wudem n unemhal-is, Laṭawi Racid, iberreḥ-d ddurt iɛeddan Uḥuddu Aɣerman (Protection Civile) n Bgayet s leḥsab n tsemhuyt n unebdu d leqdicat i yemmuggen segmi d-yebda useggas-a. Gar wayen i d-yufraren ad naf dakken irgazen n usellek, gren-d iman-nsen azal n 30141 n tikkal, ama i usexsi n tmes, i usellek n medden, i tiwin ɣer udawi, i yisehwa (accidents) deg yiberdan, i teftisin neɣ i wayen-nniḍen.Ma nemmeslay-d ɣef teftist, 14 n yimdanen i yemmuten deg waman. Ma d isehwa dɣa, tugi ad tenqes twaɣit deg yiberdan-nneɣ. Imi ttwajerrden aseggas-a lqidar n 2736 n tuffɣiwin i usaɛef deg yiberdan. D ayen i d-yesḥeḍren 64 n yimattanen d 1944 n yimejraḥ.Ayen iɣef ilaq ad d-nerr awellih, dima ɣef leḥsab n Tmehla n Uḥuddu Aɣerman, dakken tanekra mgal indaren n tmes deg tẓegwa ur telli teshel. Iban-d lḥal tewɛer ugar n tin n yilindi. Dɣa, ma drus 883 n yindaren i d-yellan gar yulyu d ṭuber, almi glan s 1958.61 n yihikṭaren seg umaḍaɣ d tuga, ɣas ukin yirgazen n usellek.
Mhenni Khalifi