Ass n lǧemɛa yezrin, imezdaɣ n La Crête-Rouge deg tɣiwant n Leɛǧiba myefken ttiɛad s aɣerbaz amenzu n taddart-nsen iwakken ad xedmen yiwet n twizi n usizdeg d useggem n yiwet n terga i d-iɛeddan zdat lakul ideg qqaren warraw-nsen.
D ilmeẓyen neɣ d imeqranen, d tirebbaɛ i d-ttasen yal wa s wacu i d-yegla d ttawil iwakken ad sbeɛden s kra yellan d amihan ɣef yinelmaden. Imi d yiwen n cɣel yuḥwaǧen aṭas n wallalen, imezdaɣ n Tqaɛet yeɛyan deg uraǧu gezmen-tt deg rray iwakken ad d-swejden ayen i iwulmen s tedrimt-nsen. Ɣef waya, yal amezdaɣ yewwi-d ayen iwumi yezmer, wa d rrmel, wa d ssima, wa d uzzal wayeḍ d iɣil-is. «Nefra-tt gar-aneɣ iwakken ad nekkes tifxet-a yettwandin i warraw-nneɣ. Yal ass nettraǧu aniwa ara yeɣlin deg uxemmuj yecban wa, mi akken imḍebbren terza temsalt qqnen allen-nsen zdat tudert n yinelmaden. Newweḍ ɣer tallit anda ala win yenṭerren ara yeḥrirten ! Wamma, limer d lebɣi llan srabes yettuxessen I cɣel-a ara xedmen acḥal aya. Meɛna, skud I mazal tagmat, agerruj I aɣ-d-ǧǧan imezwura-nneɣ ur inegger-a. Tacemlit d tin yessuzufen lḥif di tudrin, ihi ass-a nekni nerra-as azal, nemlal-d !” Dɣa d wigi I d imeslayen I aɣ-d-yenna yiwen n ubabat yerfan zdat tsusmi n yimḍebbren ɣef lḥif ideg ttidiiren yinelmaden. Imezdaɣ n Tqaɛet heggan-d daɣ iwakken ad bnun zdat n uɣerbaz kra n tseddarit I yinelmaden iwakken deg wussan-a n tegrest ur ttɣimin ara I lehwa d usemmiḍ. D yiwen n usenfar s wazal-is iɣer kkren yimezdaɣ n taddart. Ayen I d-ijebden lwelha-nneɣ mi nerza ɣer twizi n yimezdaɣ n taddart-a, d anabit n yimḍebbren ama n tɣiwant neɣ n srabes nniḍen.
Smail. M