I lmend n usfugel n wass agraɣlan n yimaɛdar i d-yettasen di 3 duǧember n yal aseggas, tiddukkla n yimaɛdar “Asirem n Uqbu”, thegga-d yiwen n wahil s wazal-is taggara n ddurt-agi yezrin, deg uxxam n yidles n Uqbu. Di tazwara, yella-d usterḥeb s yinebgawen i d-yusan, syin yefka-d awal uselway n tiddukkla Mass Kamel iseddiken ɣef tebɣest sɛan yimeɛdar deg umagar n wuguren i d-ttemlililin yal ass di tudert-nsen. Syin akin, yella-d wuldi n wudem unṣib n yiwet n temsikent n tqendurt taqbaylit akked d lmaklat i d-xedment tullas yettɣiman deg yixxamen. Ɣef ttnaṣfa n uzal , yella-d usenɛet n yiwet n tceqqufet n umezgun i d- heggan tarbaɛt n yiskutiyen n Uqbu. Ɣer taggara, yella-d ufraq n kra n warrazen d wallalen akka am tkersin i kra n yimeɛdar yenxessen…atg. Tekfa tmeɣra s kra n tegnatin n ccna d unecraḥ sɣur tarbaɛt n Lewhama i d-yerzan, ad tekkes lxiq i yimeɛedar. Afud igerrzen i tdukkla Asirem n Uqbu.
B. Benhamouche