Aṭas n tdukkliwin i yellan ttferfirent s warmuden, iseggasen-a iɛeddan. Skud tella tedrimt, yella lebɣi. Acu kan, aseggas-a, ufant-d iman-nsent gar ẓẓebra d ufḍis. Ssebba n waya, tcudd ɣer liḥala ideg i d-ggrant si tama n tedrimt, ladɣa mbeɛd mi i tent-tuɣ tdamsa n tmurt. Yebda kan yettenqas wazal n upiṭrul, tebda tettẓeyyir tudert n uɣerman. Ma nemmeslay-d, dɣa, ɣef kra n tdukkliwin n usamar n Bgayet, am tɣiwanin n Ayt Smaɛel d Tsexriwt, ad naf belli tanfalit ‘’ulac tadrimt’’, d yiwet n tefyirt i d-yettuɣalen deg yilsawen n yiɛeggalen n tdukkliwin mi ara d-nebder kra n leqdic. Iban-d tikkelt-a, ur d-kcimen ar yidrimen am zik ɣer texzanin n kra n tdukkliwin, ladɣa tidelsanin deg-sent, akken ad izmirent ad xedment akken ilaq, am waken uɣent tannumi. Llant ula d tin i yesneqsen seg wahil, imi ulac s wacu ara kkrent i uheyyi. Aya ihi d ugur ameqqran i d-mlalent tdukkliwin n Bgayet s umata. Rnu, ɣef wamek i d-yettban udem n useggas i d-iteddun seg tama n tdamsa, a-t-an yezmer ad ikemmel, ad yenṭer ugar umussu asdukklan.
Mhenni Khalifi