Segmi yezri lawan n yigumma i yettilin deg ṭṭjur, aṭas n yisenfan n yifrax i yettqabalen tuɛert akken ad afen tagella-nsen. Ifrax ihi tura, neɣ ussan-a, skud yekfa, neɣ yenqes yuqa wayen ara ččen deg lehwa, ttuḥettamen, am yal aseggas, ad tsubbun ɣer lqaɛa, ad nadin kra swayes ara kksen laẓ. Acu kan, yesḥissif maḍi lḥal, acku amdan ur yettaǧǧa igḍaḍ-nni, ad idiren amek akken uɣen tannumi. Neẓra belli seg wacḥal-aya, gren kra n yiterrasen deg ccɣel n tqefftin, ttkellixen s laman ifrax ur neḥsi send ad rsen fell-asent dakken d tamettant i ten-id-yettraǧun. Seg qeddac d tamnaḍt ideg tettili tmeddayt, ad d-d-nebder seg-sent tid n Ayt Smaɛel d Tsexriwt. Imi deg tamiwin-a, teqwa tmeddayt d tmenɣiwt n leṣnaf n yigḍaḍ, am uɛeẓẓi d wiyaḍ, di yal akud ideg nella. Ccɣel-agi i yettwassnen seg zik, d imeqqranen kan i t-yeṭṭafaren, qqlen lemden-t ula d imecṭaḥ. Acku tura nẓerr arrac n semmus, sḍis almi d ugar n mraw n yiseggasen deg leɛmer, ttruḥun ɣer tẓegwa akken ad mdin. Iban belli yal yiwen amek yettwali taluft-a n tmeddayt, yal wa d acu n rray-is deg-s. Ɣas ahat llan aṭas n wid i yellan mgal, ur asen-tehwi tmenɣiwt n yifrax i yettcebbiḥen agama, lameɛna widak imeddin ur zdin tamuɣli yid-sen. Imi zgan qqaren-d dakken ma yella llum s tidet, ilaq ad t-terren ɣef yimezwura i d-yebdan ccɣel-a, wamma nutni d attbeɛ kan i tebɛen. Dɣa, ad neɛqel deg wawal-nsen belli ɛewwlen ad kemmlen tameddayt-a i d-ufan, mazal ur ttxemmimen ad tt-ǧǧen, ulamma aksum n yigḍaḍ-nni ur yettqenniɛ ur yesserway.
Kaysa Khalifi