Lḥaǧ Saɛid si taddart n Tala-Ixlan, isɛa kan snat n teqcicin yiwet d tuzyint, ssawalen-as Lǧuhar, tayeḍ ur tesɛi ara ssifa, ssawalen-as Tasaɛdit. Tuzyint, Lǧuhar, yuɣ-itt Aɛmer-Waɛli si taddart Gefran. Semmi-s, Muḥ Lḥaǧ Awmer, ibɣa ad d-yawi uletma-s, Dehbuca, tuzyint-nni. Nettat d agur, tezyen tif uletma-nni. Semmi-s, Aɛmer-Waɛli, ur yebɣi ara, yugi, yussem, issefreɣ-it ɣer uḍeggal-is imi ula d netta yebɣa-tt zik. Iwwet ɣer-s Muḥ Lḥaǧ Awmer, yugi baba-s, inna-as mačči Aɛmer ugiɣ ad as-fkeɣ Lǧuhar, fkiɣ-as taberkant, ur tent- semliliɣ ara deg yiwen uxxam. Ifka-tt i wayeḍ.
Asmi Aɛmer-Waɛli imlal-d ɛemmi-s-nni, yenna-as: ‘’a Muḥ Lḥaǧ Awmer! Seg wasmi truḥ yelli-s n Lḥaǧ Saɛid ur d-tekcimeḍ s axxam. Zik, d aḥbib, tettaseḍ-d, tura ur d-tettaseḍ ara’’.
Yenna-as:’’ ur nettaseɣ ara’’!
Tɣaḍ-iyi lalla Tasaɛdit
D aqadum n tayeddit
Terna-d d takna ɣef Lǧuhar
Tamezwarut tugi-k
Taneggarut teqbel-ik
Ttif lmut teɣzi leɛmer
Ma zziɣ-n s axxam-ik
Teḥṣiḍ d lmetl-ik
D ul-ik xas ad iyi-iḥqar
Ramdane Lasheb