Tiddukkla tadelsant n yinaẓuren n Yiwaḍiyen, s tallelt n waṭas n yidisan gar-asen, Axxam n yilmeẓyen n Yiwaḍiyen, Asqamu Aɣerfan Aɣiwan (APC) akked umussu addukklan…atg. Suddsen-d ddurt tadelsant i lmend n usfugel n useggas n yimaziɣen amaynut «Yennayer 2967», gan-tt d tajmilt i win isbedden takadimit tamaziɣt deg tmurt n Fransa deg 1966/1967, wagi d Mass Bessaoud Mohand Arab. Ad yeddu leqdic-agi ɣef teɣzi n 5 n wussan. Yeldi tiwwura-s s wudem unsib ass n ssebt iεeddan, 8 deg yennayer 2017, ad yekfu ass n, 13 deg waggur-a ideg nella. Ma d ahil yettwajerden i lmend ddurt-agi d amerkanti, imi tella-d iḍelli ssbaḥ deg uxxam n Yilmeẓyen n Yiwaḍiyen tulya tunsibt n leqdic-agi s tezrigt tis snat n temsizzelt n uẓawan di tewsit n «Ceεbi», tettekemmil ula d ass-agi n letnayen 9 deg waggur n yennayer. Ma i uzekka 10deg yennayer2017, ɣef 10h00 ssbaḥ alamma d 13h00, ad yili usarag sɣur tlata n yimussnawen d yimeɣnasen n tamaziɣt ; Brahim Ben Taleb, Bekkouche Said, Sidir Omar. Ad d-awin awal ɣef umecwar n tudert d imuhal n Bessaoud Mohand Arab. Ma ɣef 13h00 alamma d 16h00, ad d-yili usenεet n yiwen n usaru s tamaziɣt. Ma d selazekka 11 deg yennayer2017, ad d-yili ɣef 09h00 alamma d 12h00, tɣuri n yisefra sɣur aṭas n yimedyazen. Ma ɣef 12h00 d imekli n yennayer (sseksu s yiyuzaḍ), ad t-id yetbeε yiwen n warmmud amensay i warrac imecṭaḥ. Ma ɣef 13h00 d asawen, ad d-tili tmeɣra meqqren n ccna, sɣur aṭas n yinaẓuren. Ass n yennayer 12 deg yennayer2017, ɣef 08h00 n ssbaḥ, ad d-ruḥen seg Yiwaḍiyen ɣer taddart n Uqawej, i wakken ad sersen tameqqunt n yijeğğigen ɣef uẓekka n Bessaoud Mohend Arab, imi dina i yettwamḍel. Tameddit n wass, ad d-yili wurar n tceqqufin n umezgun, sɣur tarbaεt n Ait Ergane akked tiddukkla n yilmeẓyen n usirem n Ait Abdelmoumen. Ma d ass aneggaru 13 deg yennayer2017, tasebḥit n wass, ad d-yili wallus n tmacahut n yennayer, ma di tmeddit, ad d-tili tukci n yigerdasen n usebɣes d tmeɣra n taggara. Am wakken daɣen i d-ilint waṭas n temsikniyin ɣef teɣzi n 5 wussan-agi, gar-asent iselsa iqburen, tiqenddurin, lfeṭṭa, talaɣt, taklut, isenza s ubuddu, akked temsikent n wayen i d-yeğğa d wayen yuran ɣef Bessaoud. Mass Amar Mokrani, d aselway n tiddukkla yenna-d: “Ad snimmreɣ aṭas tiddukkliwin tidelsanin i d-yerran i teɣri-nneɣ. D tagnit daɣen anida i d-nsemlal aṭas n yinaẓuren i d-iseknen axeddim-nsen i yimezdaɣ n Yiwaḍiyen, u nerra tajmilt meqqren i yiwen n urgaz ameqqran deg timeɣnest n tmaziɣt”.
Ghani Amazigh