Seld sin n wagguren segmi fukken wussam n ḥertadem,igenni iɛuqqer. Tiqit n waman ur d-teɣli di tuget n tamiwin n Tefriqt Ugafa. Azemmur, yebren ɣef tzemmrin, igran ur mɣin akken iwata. Laɛwanser, kawen,d aɣurar, almi bdan yifellaḥen, ttaysen. Ha-t-a yejba-d yennayer, yegla-d s lxir-is. Terɛed, tebreq. Yeddel ubernus n udfel tiqucac n yidurar. Izeblac, ttqiṭiren-d am tnififet di leqram-d. Lemwared akked laɛwanser fin-d. Tiwaculin, zint-d i lkanun. Yennayer, d lfal amerbuḥ i useggas.”Zik asmi neṭṭafar leḥsab n uwatay n lejdud-nneɣ, werǧin i neqḍiɛ layas ɣer tegnewt. Nettraju yennayer ma ur d-ɣlin ara waman di tewwurt useggas-nneɣ, ɣellin-d di laɛqab , deg umerḍil n temɣarin’’, i d-yenna Dda salah, d amɣar ameqqran n taddart n Lmecta, 94 n yiseggasen di tudert-is. Aya, ad yili d tbut ɣef wazal yesɛa uwatay n yimaziɣen di temnaḍt n yilel agrakal .
Brahim Benhamouche