I tikkelt tamezwarut, ‘’Cicnaq’’ yezzi-d i temnaḍin n Tubiret imerra. Iɣerbazen mmugren amenzu n yennayer akken iwata, yal tama acu i as-thegga. Yella yakan wayen i ten-yezdin, imi taɣlift n usegmi tuzen-d yiwen wahil ara yettwaxedmen, anda ara naf yiwet n temsirt icudden ɣer umezruy n yennayer d wayen i yezzuɣur d idles, d tadamsa, d aseḥbiber ɣef twennaḍt.
Ihi, am wakken yettuɛeggen, d aɣerbaz alemmas Khales Hammouche n Beclul i yettwafernen i wakken ad tili deg-s tmeɣra s wudem unṣib. Da, ahil i yettwaheggan d amerkanti, imi ccɣel yettwaxdem akken iwata. Timsikkent, tsuma aṭas n yiḥricen ama n yiselsa, n wučči, d wallalen yemxallafen. Inelmaden, tettunefk-asen tegnit I wakken ad gen yiwet n temsizzelt n ddabex n uḍar, tayeḍ ɣef unadi yerzan amezruy n yennayer, tayeḍ-nniḍen ɣef wučči lɛali. Lḥasun, inelmaden imerra lhan-d d uxeddim, almi yuɣal uɣerbaz d annar i temsizla d unadi. Ass dɣa n umenzu n useggas n yimaziɣen, aṭas n yinebgawen i d-yusan. Amenzu, d anemhal n usegmi n Tubiret akked d tmarayt tamatut n tnemehla-agi, imḍebber n tnezzayt n Beclul akked d uselway n tɣiwant-a, amwekkel n yiɣallen n laman, inemhalen n yiɣerbazen-nniḍen d waṭas n yimawlan n warrac. Da, tameɣra temmed, imi aselmad n uẓawan i d-yesbedden yiwet n terbaɛt seg yinelmaden-is, ssedhan mačči d kra widen akk i iḥeḍren s tezlatin yeččuren d lemɛun. D ayen yeǧǧan Mass Mourad Bouziane, anemhal n usegmi ad d-yini:” akka i d asfugel s yennayer, imi nefka tagnit i yinelmaden i wakken ad d-beggnen tizemmar-nsen di yal aḥric.. D tarrayt ara ten-yeǧǧen ad ḥemmlen leqraya, ad walin aɣerbaz s wudem lɛali ad ttḥirin ad d-asen, mačči ad regglen seg-s “. Si tama-s, amaswaḍ n tmaziɣt yewwi-d awal ɣef umezruy n yennayer anda i d-ibeggen iswiyen n usfugel yis-s, anda amager n useggas amaynut ur yettɣimi ara kan deg seksu d uyaziḍ, maca ad truḥ tmuɣli mebɛid ɣer yiḥricen-nniḍen ara yeǧǧen amdan ad yesseḥbiber ɣef umezruy, ɣef tmurt, ɣef twennaḍt d yidles. Tasebḥit n umenzu n yennayer, d tasnawit Mohamed Boudiaf n At Leqser i yeswejden yiwet n tmeɣra s wazal-is, imi inelmaden, iselmaden d yimawlan sdukklen iɣallen-nsen i wakken ad ilin s wudem icebḥen deg usihar-a. Ula deg tama n Ain Bessem, Sour El Ghozlane, yennayer yella deg ttiɛad i wakken tameɣra terza Izzayriyen mačči yiwet n tama kan. Aya, nwala-t deg Tlemcen anda i d-tella tmeɣra taɣelnawt ɣer tama n Mostaganem… Deg Saharidj, d tafaska tameqqrant n umezgun i yettwaxedmen, imi ass n umenzu n yennayer i d-yella ufran n terbaɛt i d-yufraren deg umezgun. Ɣer tama n waya, d timsizzelt n tzabut deg tmaziɣt i d-yellan deg tɣiwant-a. Azal n 136 n yinelmaden n uɣerbaz alemmas i d-yusan ad ttikkin deg temsizzelt-a. D tanmehla n yimeẓyen d waddal n Tubiret, s lemɛawna n tin n usegmi d tesweḍt n tmaziɣt i yellan deg lmendad. Ulac tama yeqqimen deg tsusmi, imi ad naf deg tɣiwant-a, taddart n Yilyiten i d-iheggan yiwet n tmeɣra tameqqrant. Deg temsikkent, ad naf aṭas n yisufar n wučči, iselsa d kra n wallalen yuttusxedmen zik-nni, ama deg tyerza, deg uzeṭṭa neɣ imahilen-nniḍen. Ɣer tama n waya, yella-d yiwen n usarag ɣef umezruy n yennayer d wayen i t-yurzen ɣer uselmed n tmaziɣt. D taddart imerra i yettikkin deg tmeɣra-a. Yal amezdaɣ s wacu i d-iɛawen, d ayen yeǧǧan imḍebbren n twilayt usan-d s ṭṭaqa I wakken ad ḥeḍren i tfaska-agi daɣ ad snemren imezdaɣ n taddart ɣef useḥbiber-nsen, ɣef umezruy d leɛwayed. Deg Leɛǧiba, d sin n yiɣerbazen n uswir alemmas i yellan deg ttiɛad I wakken ad maggren aseggas amaynut s tmeɣra. Deg Tamra, Tiddukkla “Kafil El Yatim” akked “El Ihsan” i iqedcent akken iwata i wakken ad ǧǧent ass yecban wa d win n tmeɣra, n lferḥ d usfillet ɣer lxir d lehna. Ass n ssebt yezrin, d Mass Cherifi, lwali n Tubiret i yellan deg tɣiwant n Saharidj anda yefka arrazen i wid i d-yufraren ama deg umezgun neɣ deg tzabut.
Smail. M