Ayen i aɣ-yesferḥen imi yella waya deg wahil n uswir-nneɣ (3AM) : asegzi n wansayen d urmud. I lmend n yennayer 2967, nerza, nekni s yinelmaden n uɣerbaz alemmas Atmaten Imeɣrasen Kerkache akked tselmadt-nneɣ, s axxam n yidles Mulud Mɛemmri n Tizi Uzzu, anda i nufa ahil d amerkanti i d-heggan i lmend n yixef n useggas n yimaziɣen. Akken kan i newweḍ ɣer daxel, nufa timsekniyin n waṭas n wallalen d yirmad i xeddmen deg temnaḍt n leqbayel. Ayen i aɣ-yesferḥen imi yella waya deg wahil n uswir-nneɣ (3AM) : asegzi n wansayen d urmud. Nebḍa d igrawen, syin yal yiwen yefren asenfar ara yexdem ɣef waya. Nqerreb ɣer wid igan timsekniyin-agi, nemmeslay yid-sen u nexdem-d teswirat i tgelliwin i nessewway di yennayer, am seksu bu-sebɛa n yisufar, tiɣrifin, tamtunt n uferraḥ, timellalin, tuftiyin, lexfaf…atg. Nqerreb, daɣen, ɣer uẓeṭṭa, lfeṭṭa, tiqnedyar n leqbayel, talext, ɣer wid, diɣ, ixeddmen iqerdacen. Mi nekfa axeddim-nneɣ daxel, neffeɣ-d s amraḥ, nufa-d, din, iḍebbalen n leqbayel, n Ɣerdaya, n Xennecla, n Mɛesker akked wid n Ǧelfa. Imdanen akk mɛacaren gar-asen. Ferḥen, ceḍḥen, tilawin, seɣratent, timɣarin, sfuɣurent. Nkemmel akken zhu d cḍeḥ almi d lawan n wučči. Nečča seksu bu-sebɛa n yisufar s uyaziḍ. Lbenna-s, werǧin i tt-neẓra imi i t-nečča d agraw. Tameddit, nruḥ ɣer tzeqqa tameqqrant, nwala anaẓur-nneɣ ameqqran Taleb Tahar. Ass-a, nesɛedda lweqt igerrez, nefreḥ aṭas, newwi-d aṭas n tmussniwin, yerna nekkes-d lxiq. Ass-a, ur nezmir ara ad t-nettu. I lmend n wass-a, nessaram aseggas ameggaz i yinelmaden n uɣerbaz-nneɣ d wid akk i ixeddmen deg-s ɣef uqerru-nsen, Mass Bounoua. Aseggas ameggaz i yimaziɣen anda ma llan.
Inelmaden n uɣerbaz Atmaten imeɣrasen Kerkache.