Am yal aseggas, yal tamnaḍt neɣ tama amek tettqabal amenzu n yennayer. Deg Makouda, suddsen-d leqdic adelsan i lmend n usfugel n yixef useggas n yimaziɣen amaynut ‘’Yennayer 2967’’. D amussu asdukla n Tala Bouzrou i d-iheggan ass-nni n 12 deg yennayer 2017, yiwet n tmeɣra n ccna s wazal-is. Imi ccnan azal n 15 n yinaẓuren, gar-asen: Karim Khelfaoui, Karim Yeddou, Djilali Hamama, Dehmani Belaid, Madjid Fahem, Rabah Oultache d wiyaḍ. Tella-d daɣen “Tombola” ɣer taggara n tmeɣra-agi, i d-yellan deg unnar n uxxam n yilmeẓyenn Tala Bouzrou, i yetabaεen ɣer tɣiwant n Makouda. Ula deg Ouaguenoun, yella-d usfugel n tewwura n useggas 2967. D tiddukkla Tadelsant “Uqeṭεan n Uqawej” n taddart-agi n Uqawej, i itabaεen ɣer tɣiwant n Ait Aissa Mimoun. D ahil d amerkanti i yettwaxdamen, sɣur tiddukkla-agi deg wass-nni ahad d amhad. Ass amezwaru, 11 deg yennayer 2017, xedmen deg-s timsikent n wayen i d-yeğğa d wayen yettwarun ɣef Bessaoud, deg uxxam-is yellan deg Uqawej. Llan-d, daɣen, tiyaḍ, n wallalen d tɣawsiwin tiqburin, deg uxxam n tiddukkla-agi. Ma deg wass n 12 deg waggur n yennayer, xedmen aṭas n temsikniyin, gar-asent: iselsa, tiqneddurin, unnuɣ, talaɣt, taklut, allalen iqburen…atg. Yella-d, diɣen, usersi n tmeqqunt n yijeğğigen ɣef sbaḥ n wass, ɣef uẓekka n Bessaoud Mohand Arab, yettwamḍelen dinna. D tinagiyin ɣef tudert-is d tiktiwin-is. Mebla ma nettu tikli (carnaval) n Ayrad, deg tlemmast n taddart, xedmen diɣen, ɣer tmeddit n was, temsizzelt n uyaziḍ.
Adaoun Abdelghani