Ulamma aql-aɣ tura deg tegrest tasemmaḍt, lemḥayen n waman ḍulent ur kfant ɣef umezdaɣ n Bgayet. Am wass, am yiḍ, imḍebbren n yixxamen zgan d accekti ɣef lexsas n waman i d-yettuɣalen i tberninin-nsen. Ma tuɣ zun ala wid izedɣen tamdint i tent-yuɣen s waṭas, tura ula d idurar – taɣbalut tamenzut n waman-a – ḥeslen am umenṭas, ur ufin tifrat i ssaramen. Ma nemmeslay-d ɣef snat n tɣiwanin n Usamar-anẓul n twilayt n Bgayet – Ayt Smaɛel d Tsexriwt – ad d-nini dakken tewweḍ tfidi s iɣes seg waṭas-aya. Tezger taluft aḥdid war ma yella-d ubeddel. Ayen yesḥeyyren ugar imdanen daɣen, d amek llan sin n yibarajen sdat-sen, maca ur rwin aman! Ɣef leḥsab n uselway n tɣiwant n Ayt Smaɛel, Mass Ɛebdun Nasir, mi yettwasteqsa ussan iɛeddan, d ADE n Bgayet i yestehzan ɣef ccɣel n usiweḍ n waman seg Lɛenser Azegza ɣer Ayt Smaɛel. Imi d iseggasen tura segmi ɣillen At temnaḍt-a, ad d-jebden taɣbalut-a n tudert, meɛna am win yettraǧun taḍsa seg lmeyyet. Ladɣa segmi yerna yeḥbes ur iban, usenfar-a n tiwin n waman seg Leɛnaser. Amḍiq-a, i usmekti kan, yesɛa aṭas n waman am wakken nezmer ad nefhem deg yisem-is. D acu, ur tessaweḍ ar tura tɣiwant n Ayt Smaɛel, ad teɣlet kra n tiqqa seg umkan-a yebbeẓbẓen s waman.
Kaisa Khalifi