Yuɣal-d wugur n lexsas n usafar n uyefki deg wakal akk n tɣiwant n Ait Aissa Mimoun. Aṭas n tuddart i iḥuza lexsas-agi. Niqal ttawin-d tlata n tikkal i ddurt ayefki ɣer ugafa n tɣiwant-a, s Uqawej d asawen (azal n 5 n tuddar), yuɣal snat n tikkal i smana. Ma seg tazwara n waggur-agi, yuɣal ala yiwet n tikkelt i d-ittṣaḥen tama-a, d ayen yessewhamen n ssaḥ. Tikkelt-agi, qqimen yimezdaɣ n tuddart-agi azal n ddurt mebla ayefki, imi tikkelt taneggarut ideg i t-id-wwin ass-nni n ttlata n 10 deg waggur-agi n yennayer, armi d ass-nni n ttlata iεeddan 17 deg waggur-agi ideg nella. Yerna ala tlata n tcelwiḍin i yal axxam, ama d win yesεan aṭas n lwacul, ama d win ur nesεi ara aṭas n dderya. Am waken, daɣen, llan yixxamen i yewwin, llan wiyaḍ ur wwin ara ula d tacelwiḍt. Annect-agi deg tallit n tegrest d cceda, ideg yettzidi uḍlab n usafar-agi. D ayen i ten-yeğğan ad d-ttaɣen ayefki n tebwaḍt, yecban «Candia» s 80 DA i yiwet n tebwaḍt, neɣ win-a n Llaḥḍa. Ssebat ugtent ma d tifrat ulac; tikkelt d lluzin i iḥebsen ɣef lxedma, tikkelt ulac asafar i d as-sexlaḍen i d-ttawin seg tmurt n Fransa, tayeḍ tayeḍ… Imezdaɣ n tɣiwant-agi, la ttrağğun s ccuq, melmi ara ad d-tili tulya n lluzin-nni tamaynut, yellan deg Tala Athmane. Ahat d tifrat i wugur-agi n lexsas n lɣella deg tḥuna n tɣiwant-a i ttiḥwiğin yal ass.
Adaoun Abdelghani