Yettban-d mazal ad tḍul tiɣri-a n ‘’Afalu n lmut’’ i fkan yinehharen n ubrid aɣelnaw wis 9 i ufalu n Xerraṭa, i d-yezgan s wazal n 60 n yikilumiṭren seg twilayt n Bgayet. Dɣa, deffir n ubaxix i yeḍran ayyuren iɛeddan ɣef ssebba n ukamyun iwumi yeqqers uḥebbas, teḍra-d ddurt-a kan, twaɣit-nniḍen n ubrid i yeglan s yiwet n terwiḥt, daxel ufalu-a. Imi llan wid i tent-yuɣen s unṭer wwin-ten ɣer sbiṭar. Am dima, yeḥḍer deg usehwu-a (accident) yiwen n ukamyun n ttɛebya yeẓẓayen. Ɣas ma d aɛeddi iweɛren sɣur yiwet n tkerrust i yellan deffir n wayen i d-yeḍran, ɣef leḥsab n waṭas n tnagiyin. Iban-d segmi yemdel ubrid wis sin n Ɛecba, ideg ttilin-d yiqeddicen n ussusaɛ, izad umihi (danger) n twuɣa s sin n yiberdan ahat. Ladɣa imi seg wacḥal-aya i yeffeɣ wawal ɣef ufalu-a, belli ilaq-as ad as-yemmag ureqqaɛ s telqayt akken ad yili iwulem cwiṭ i tikli, ad neqsen deg-s yisehwa. War ma nettu ikumyan imeqqran i yettilin, deg waṭas n tikkal, d ssebba n yibaxixen-a n ubrid. Ihi, deg tsemhuyt-a n yigeffuren d texser n tegnawt, ala aḥader i izemren ad d-yemneɛ bab n tkerrust seg tmettant.
M. K.