‘’Ṭṭes di trakna, tiniḍ-as ccetwa ḥlawet’’. Akka i as-yeqqar lemtel i aɣ-d-ǧǧan yimezwura. Lmeqsud n tenfalit-agi, neɣ anamek-is, fehmen-t akken iwata iɛeggalen n Waggur azeggaɣ azzayri n temdint n Tizi Uzzu imi ttafen imdanen nsan berra i usemmiḍ deg yal azniq n temdint n Tizi Uzzu.
‘’Yal iḍ, ɣef sebɛa, ttefɣen yiɛeggalen n Waggur azuggaɣ azzayri ɣer yizenqan n temdint n Tizi Uzzu, ttawin lmakla akked yiceṭṭiḍen i yimdanen-nni yettnusun deg berra. Llan deg terbaɛt-nneɣ 16 n yirgazen, 14 n tlawin, 6 n warrac d 2 n teḥdayin. Wigi akk, xeddmen baṭel, s lebɣi-nsen’’, i aɣ-d-yenna Mass Samir Bouaziz, anemhal n Waggur azeggaɣ azzayri n temdint n Tizi Uzzu ass-nni n ssebt. Ass-nni, dɣa, i asen-d-tseddeq tidddukkla n yimawlan n tḥuna ugar n 200 n tẓerbiten ara fken i yimdanen-agi yegganen deg berra akked twaculin ixussen. Xas ulamma ur ten-tettɛawan ara dduwla, meɛna yella wansi i d-ttḍebbiren ama d llebsa neɣ lmakla i swayes ttqabalen imdanen-agi yenṭarren. ‘’Llan wid i aɣ-yettɛawanen. Seg umewaru n duǧember ar tura, aql-aɣ nmudd kter n 2100 n tiram n lmakla. Ad nkemmel akka alamma d aggur n meɣres.u nezmer ad nkemmel akkin ma yeqqim lḥal akka semmeḍ’’, i aɣ-d-yenna yimḍebber amezwaru n tuddsa-a. Llan kra n yimekwan i yettwaheggan i lmend n waya, i lmend n win ur nesɛi ara anda ara nsen. Acu kan, ɣef wakken i aɣ-d-nnan iɛeggalen-agi n Waggur azeggaɣ azzayri, d akken wigi yegganen deg berra, ttagin ad ddun ɣer yimekwan-agi. Tikwal reffun ɛad mi ara asen-qqaren, u ttagin ad ččen lmakla-nni neɣ ad ṭṭfen iceṭṭiḍen. Ḥemmlen ad qqimen deg yiberdan, ad nsen i usemmiḍ wala ad ddun sani-nniḍen. Cwi kan, llan wid i yettukelfen deg-sen ama seg tama n lmakla, n llebsa neɣ s udawi. Ɣef wakken i aɣ-d-nnan, werǧin yemmut yiwen, neɣ yekcem ɛad ɣer sbiter imi llan wid i ten-yettdawin deg umekkan anda ttilin. Seg tama-nniḍen, tella Tiddukkla ‘’Djak Lkhir’’ i d-yelhan seg yimeɣban n tudrin n leqbayel. Yal tikkelt anta tama uɣur ara truḥ, ad tawi tifersuday i wid ixussen. ‘’Aql-aɣ tura, nessaweḍ 500 n tferṣuday ara nefreq deg ussan i d-iteddun. Iswi-nneɣ, ad nessiweḍ ɣer 1000’’, i aɣ-d-yenna Imarazen Wafik, imḍebber deg tiddukkla-agi.
Hocine Moula