Segmi ara d-tezziḍ deg Bouaiche iwakken ad teṭṭfeḍ abrid awilay wis 98 ara yessiwḍen alamma d M’chedallah, anehhar yettmagar iɛewwiqen ur nesɛi leḥsab. Aɣbel amenzu yella-d mi akken tikebbaniyin yesseddan isenfaren n waman d lgaz i yettaǧǧan abrid deg yir liḥala mi tgezmen iwakken ad sɛeddin iqudas. Deg umkan-a beddemma deg Bouaiche, segmi akka i ssawḍen aman d lgaz ɣer kra n yixxamen, ǧǧan iɣisi deg tlemmast n ubrid, d ayen yessaɛwaqen tikli i tkeryas. Deg wussan-a n ugeffur, imukan-nni udren am wakken yuder wakal i as-dlen iɣisi-nni, d ayen yeweɛren aɛeddi mačči d kra. Ma terniḍ-d akka kra n uqeddim ɣer zdat, tama n La Crête-Rouge, ad d-naf liḥala yecban tamezwarut-a s ssebba n usɛeddi n yiqudas imeqqranen n waman. Dɣa dinna, ad d-tinniḍ d taḥemmalt i d-iɛeddan imi icerrig yugar tafawet i ixedmen. Asmi ara yezzi umsebrid tama n M’chedallah, nnig n yiɣisan-a ad naf ibabdren yemseḍfaren wa deffir n wa almi ɣef teɣzi n wazal n 15 ikilumitren, ugar n 30 n yiḥebbasen i yettwaxedmen. Seg Wasif Asemmaḍ alamma d Aɣazi, tɛeddiḍ ɣef At Yexlef, liḥala n ubrid d tin yenṭerren, imi ɣef leḥsab n yimeslayen n yimdanen yattaɣen abrid-a yal ass “seg wasmi ttɛeddin da ikamyunen yessawaḍen akal s abrid ameqqran, abrid-nneɣ yenṭer mačči d kra, almi ass-a ttgamin yinehharen ad ɛebbin i tkeryas-nsen.” Seg tama nniḍen, d imawlan n yifurguten yessawaḍen imdanen iɣef yers lḥers s waṭas imi d nutni i yettɛeddin acḥal n tikkal deg wass.
Smail M.