Deg ussan-agi iεeddan i d-yeffeɣ wammud amaynut n tmedyazt taqbaylit Massa Kenza Djurdjura iwumi tefka azwel “Aru-iyi” i d-yeffɣen ɣer tezrigin «Aframed». D ammud-nniḍen i d-yernan ɣer ugerruj n tmedyazt d tsekla tazwawt, d win ara d-yawin abaɣur i tutlayt-nneɣ tamaziɣt. Tger-d deg-s ddeq-s n yisental yecban : Tarewla (haraga), ccrab, leqqmar, tayri, lexde&epsilon,; tigujla…atg. Llan deg-s azal n 132 n yisefra s teqbaylit, yerna bnan ɣef lqaleb n yisefra n Yusef u Qasi d Si Muḥend u Mḥend. Ad d-nesmekti kan belli, d wagi i d adlis-is wis sin deg tmedyazt. imi deg useggas n 2015 tessuffeɣ-d yakan ammud-is amezwaru, winna iwumi tefka azwel «Lbenna n usefru» i d-tessuffeɣ dima ɣer tezrigt-is «Aframed». D adlis n 83 n yisefra s teqbaylit, i d-yewwin awal ɣef waṭas n yisental-nniḍen, gar-asen: tayri, lefraq, nnif, lwaldin, lɣerba, timsal n ddunit…atg. Massa Kenza Djurdjura tella yakan d taselmadt n tfelsafit deg tesnawit i waṭas n yiseggasen, tuɣal tura telha-d d tira n yidlisen. Taɣuri igerrzen i yimeɣriyen!
A. A.