Asmi, tlata n yirgazen seg yimezwura n Ugemmun, Abdelkrim, Ḥeggun d Aεmer bɣan ad d-zuren Sidi Mḥed Wehlal, bdan, ttmeslayen gar-asen. Yenna-as Aεmer: ‘’a wi yeččan tacebbaḍt, ara d-ggent tlawin-nsen!’’ Inṭaq-d Abdekbir ittafgen: ‘’wi izṛan tilawin-nsen’’. Nnan-as: ‘’i kečč a Ḥeggu? D acu i tebɣiḍ ?’’. Yenna-as: ‘’nekk bɣiɣ ad d-ẓureɣ, ad d-awiɣ lbaraka i warraw-iw’’. Netta Sidi Mḥed Wehlal, isseɛlem-as Rebbi. Tilawin n At Hlal d timrabḍin ḥejjbent, ur tteffɣent ara. Mi d-wwḍen s At Hlal, ifraḥ yis-sen, yenna-asen : ’’mreḥba, lɛeslama-nwen’’. Inna i tlawin : ‘’sewwemt tacebbaḍt ha-ten-in usan-d zziyar’’. Ta tetteg, ta tesewwa, yal yiwet teɛna cɣel-is. Alammi yewwa, ceyyɛent aqcic ɣer baba-tsent, nnant-as : ‘’ha-t-a yewjed lqewt’’. Iruḥ-d, inna-yasent: ‘’awimt-tt-id kunemmti, ta ad d-tawi lqewt, ta ad d-tawi aman’’. Nnant-as :’’ amek ara neqdec sdat zziyar, yak nekennti nḥejjeb ?’’. Yenna-asent: ‘’a yess-i, tmeẓremt di tbaḍnit, ad tɛiwdemt di tḍahrit’’. Ruḥent s tergagit, sersent lqewt d waman sdat zziyar, uɣalent. Zzeyyar ččan alammi ṛwan, nnan ḥemdullah, sersen tiɣenǧawin. Issawel-asent i yessi-s, yenna-asent: ‘’ṛwaḥumt, ad tawimt ijeqduren-agi’’. Ddment ijeqduren-nni, kkrent ad uɣalent inna-asent: ‘’beddemt, teslemt’’. Izzi ɣer wid-nni, inna-asen: ‘’A win issutren tacebbaḍt, teččiḍ, terwiḍ! Fkiɣ-ak lεella, ad tetteḍ ur trewwiḍ, ad txeddmeḍ ur tɛeyyuḍ. A win issutren tamuɣli, ha-tent-in wali-tent! Ruḥ, tekkseḍ sser ɣef yess-i, fkiɣ-ak leɛma u lekḥel’’.I kečč a Wḥeggu tssutreɣ lbaraka! Fkiɣ-ak lbaraka deg warraw-ik, ggiɣ-ak am ubelluḍ n uɣanim, mi iruḥ ad iqqar, ad d-ixlef, ad d-ikker’’. Iḥya-k lḥeg, win issutren tamuɣli, tarrawt-is, ffɣen d d iderɣalen. Win issutren učči, ayen ččan, ur iban ara fell-asen. Ttmettaten ɣef uɛebbuḍ-nsen. Ma d win issutren lbaraka, amur-is iburket, inerna. Mi ikcem anda llant yessi-s, yufa-tent ttrunt. yenna-asent: ‘‘ruḥemt, win i kent-iɛuzzen, d tigellalin, ma ulac d tiklalin. Anda ara tḥejbemt ur tesɛumt ara dderya”.
Yeǧǧa-d awal, qqaren:
A wer tesɣar
A wer tedden, a wer teẓẓal
Ur tḥeǧǧeb, ur nseḥjab.
Ramdane Lasheb