Anta tameṭṭut taqbaylit ur ncewweq ara yiwen wass deg uxxam mi ara txeddem tilufa-s, mi ara tettnawal neɣ deg yiger mi ara tessusuy, mi ara tmegger neɣ mi ara tleqqed azemmur. Anta, diɣ, ur neshul ara mmi-s mi ara tebɣu ad yeṭṭes. Isefra, icewwiqen, izlan, iḥiḥayen, tibuγarin d udekker, d tiwsatin i yuγen s teɣzi d tehri deg tmetti-nneγ taqburt, syis-sent i tessaweḍ tmeṭṭut, ad d-tini tilufa iumi tettḥulfu d wayen akk i tettidir di tmetti, ama dayen yessefraḥen, ama dayen yesseqraḥen. Tamedyazt n tlawin nat-zik, yebna lsas-is ɣef uguren i d-tettmager tmeṭṭut di tallit-is, d wayen akk icudden ɣer tmetti n yimiren akked lḥif sɛeddant tlawin di tudert-nsent n yal ass. Ɣef yinig, ɣef tayri ɣef zzwaǧ d berru, d waṭas isental-nniḍen. War ma zegglent aḥric s tmedyazt-nsent, nnulent akk tiɣemmar-is. Tagrawla, daɣen, teslul-d imedyazen akked tmedyazin. Ad naf tameṭṭut tessefra ɣef tegrawla, ɣef tebɣest n yirgazen yekkren mgal lemḥella n Ufransis. Yal tadyant, ẓḍant-tt deg yisefra, yal amennuɣ skelsent-tt deg usefru. Ad naf tameṭṭut tezzuzen iman-is s yicewwiqen, akken ad tesnefsusi ɣef yixef-is, akken ad tessedhu iman-is, ama deg uxxam mi ara tettnawal, ama deg yiger mi ara txeddem cceɣl-is. Asefru, yezga d amwanes-ines n lebda, yezga s idisan-is yal ass, yal ta tleqqeḍ-it deg yimi n tmeṭṭut-nniḍen, tasuta tettaǧǧa-ten-id i tayeḍ. Tilawin n At-zik, qqarent-d ayen i tent-yerḥan s yisefra, izlan akked yicewwiqen. S waya kan i tezmer ad d-tessenfali afrayen-is deg wudem n tmetti deg-i tettidir, timetti yegnin imi-s Qqaren-d : ‘’argaz d targa, tmeṭṭut d tamda’’. Timetti n zik, tḥaz tameṭṭut deg yidis, terra-tt kan i tlufa n uxxam, ɣer usewwi d uniwel. Argaz, yella wanda yetteḥwiǧi tameṭṭut-is ad tili s idis-is, maca tameṭṭut teqqim kan d taɣawsa n urgaz. Ma yesra-tt, ad tt-id-yeddem, ad tt-yesseqdec, ma ur tt-yesri ara, ha-tt-an teṭṭef amkan-is, teqqim. Tameṭṭut si tama-s, teẓra, tegza aya. Seg wasmi ara teddu d tislit s axxam-is, ad tidir s ddaw n leɛnaya n urgaz-is akked yiɛeggalen n twacult-is. Axxam n baba-s dayen teffeɣ-it, yewwi-d fell-as ad tili akken, acku ara tt-inefɛen kan d axxam-is d urgaz-is. Ad naf tulawin di tliwa kan iḥekkunt iɣeblan-nsent, uguren ttidirent, d iɣilifen i yeǧǧan kra deg-sent ssefruyent. Tayri akked tasuft, ahat ulac tameṭṭut i tent-yeddren, xas ma llant, drus maḍi. Ad naf sin, xas msebɣan, ma yella imawlan-nsen kkren-d mgal-nsen, neɣ ma yella ugin-asen ad zewǧen, ur zewwǧen ara, acku zik d imawlan i izewwǧen i dderya-nsen. Taqcict, ur tezmir ara ad tagi argaz i as-d-yeffren baba-s neɣ yemma-s. Argaz, daɣen, kifkif, ad myezwaǧen bessif xas ma ur bɣin ara. Ad naf, At-zik, zewwǧen kan akken aẓar n twacult-nni ad yeqqim i lebda, ur inegger ara. Ma d tayri, ur tt-ssinen ara, xas ma timest-is ad tt-id-naf tezdeɣ ul n yal d ilemẓi, maca yal yiwen iḥerz-itt d lbaḍna n wul-is, ijmeɛ-itt i yiman-is, temmut yid-s. Tameṭṭut, si tama-s, teḥrez ansayen n tmetti deg-i tettidir, teṭṭef di teqbaylit, teḥrez isem n teqbaylit, xas ma urǧin tekcim s aɣerbaz. Teḥrez igerrujen ur nettaf ara deg uɣerbaz ass-a. Ɣerr ɣur-sent i d-mazal amawal n teqaylit, ad naf aya deg yisefra ḥerzent, di tmucuha, deg yinzan.
Fahim Messaoudene