Deg ussan-agi iεeddan i d-yeffeɣ wungal amezwaru s teqbaylit n uneggal d umedyaz aqbayli Mass Fahim Messaoudene iwumi yefka azwel “Anza” i d-yeffɣen ɣer tezrigin ‘’Richa Elsam’’. D ungal-nniḍen i d-yernan ɣer ugerruj n temkerḍit n tsekla tamaziɣt, d win ara d-yawin abaɣur i tutlayt. Yemeslay-d deg-s ɣef yiwen usdawan, i d-yekfan leqraya-ines, yuɣal yeqqim acḥal n yiseggasen ur yexdim ara, imi yesεa ugur deg lekwaɣeḍ n tserdest “la carte militaire”. Syin yettwaɣ wul-is s tayri, yelḥaq armi yekcem deg umaḍal n tirga d usugen (…). Ilul Fahim ass n 7 seg maggu n useggas 1981 deg taddart n “Igersafen”, deg tɣiwant n At Yeğer, deg tama n “Yiεekuren”, deg lwilaya n Tizi Uzzu. Amahil-is d aselmad deg uɣerbaz n uselmed n tẓuri (lḥirfat) deg Buzeggan. D amedyaz, d amaru, amnadi deg yidles amaziɣ, d aneɣmas. Yebda tira n yisefra imezwura deg useggas n 1993, asmi yella yeqqar deg uɣerbaz alemmas (C E M). D amaru imi yura ammud n yisefra deg useggas 2013 “Tiyersi”, i d-yeffɣen ɣer tezrigt Richa Elsam n Tizi Uzzu. Llan deg-s 38 n yisefra s tmaziɣt, yebḍa-t ɣef kraḍ (03) n yixfawen: Ixef amezwaru, ad naf yettmeslay-d deg-s ɣef ussan-is n temẓi. Ma deg yixef wis sin d timsal akk n ddunit, d wayen yettidir deg tmetti. Ma d ixef wis tlala, iga-t i usmeɣnes ɣef tmaziɣt. Ma d ayen yeεnan isental iɣef yettaru tmedyazt-is, aṭas deg-sen d ayen yerzan yal amdan, ladɣa aqbayli: Tayemmat, Taqbaylit, Agama, Ddunit, Tayri, Tudert… D amaru daɣen imi yura yakan ammud n tneqqisin d tullisin timecṭaḥ deg useggas n 2014, i d-yeffɣen ɣer tezrigin “Sefra Ber” n tmurt n Fransa. Llant deg-s mraw (10) n tullisin d mraw (10) n tneqqisin-nniḍen. Kra seg-sent d asnulfu i tent-id-yesnulfa, ma kra-nniḍen, d-agmer ɣer yimɣaren. D amnadi, diɣ, imi yettnadi ɣef yismawen inasliyen n tmurt n Leqbayel, ladɣa deg tama n At Yeğǧer, ismawen n yiɣersiwen, n yimɣan, n leḍyur, d isefra iqburen n temɣarin. D aneɣmas daɣen imi yura yakan imagraden s teqbaylit deg yiɣmisen. Yetthegi yiwen n udlis d awfus n wuraren s tmaziɣt i warrac n uɣerbaz, ad yeffɣen sya d afella. D yiwet n tullist “Tifukal’’. Taɣuri igerrzen i yimeɣriyen!
A. A.