Ass-nni n lexmis yezrin, ruḥen yinelmaden n uswir wis krad n uɣerbaz alemmas Qadum Malek i d-yezgan di tlemmast n Uqbu ɣer lakul ideg qqaren yinelmaden yeḥwajen lemɛawna «Aɣerbaz n yimeɛḍar n Uqbu», wwin yid-sen arrazen i warrac yeqqaren dinna. Nnecraḥen, ḍsan yid-sen, walan-d irmad ixedmen warrac-nni , mmeslayen d yiselmaden-nsen , kecmen ɣer tẓeɣwa ideg qqaren. Fkan-asen-d yiselmaden n uɣerbaz–nni agzul ɣef yihalen n yal aswir. ‘’Iswi- nneɣ deg tirza-agi, d aleqqem n yinelmaden ɣef kra n tanumiyin yelhan , i wakken ad uɣalen ad tḥulfun s yiɣeblan d lixsas ttidiren warrac-nni-nniḍen, i wakken daɣen ur tettwaɛzal ara tceriḥed n yigerdan-a di tmetti. Ad asen-yuɣal wazal am nutni am yigerdan-nniḍen, ad ttuqadaren’’, i d-tenna Massa Bedjou, d taselmadt n umezruy deg uɣerbaz . Ma nuɣal akka ɣer umezruy n uɣerbaz–agi, ad naf yakan iselmaden n tmaziɣt, rẓan asalu deg uselmed s tarrayin timaynutin «Pédagogie de projet», imi ttwaxedmen yakan yisenfaren di tutlayt n tmaziɣt anda inelmaden sbedden isenfaren berra i uɣerbaz deg yiseggasen yezrin . Tikelt-a, tezzi nnuba ɣer tutlayin-nniḍen. Iselmaden n umezruy, ddan deg ubrid-nni ,bdan qeddcen s tarrayin timaynutin. Fkan tagnit i unelmad i wakken ad yesbded isenfaren-is netta s timad-is, mačči alamma yefren-as-d uselmad asenfar ara yexdem. Tikti n usenfar-agi, teffeɣ-d deg tneɣrit, d tikti n yinelmaden, d nutni i yextaren asenfar s lebɣi-nsen , imi nutni yakan sɛan iswi ad sbedden tadukli iwumi semman ‘’Asirem d lemɛawna’’, ula deg wahil aɣurbiz yedda-d yiwen n uḥric i d-yettmeslayen ɣef wazal n tdukliwin di ttrebga n tmetti,syin-a dɣa i d-jebden lexfed n tikti almi sawḍena, sbedden asenfar-nsen . ‘’Di tizra n wass-a, nufa zik aṭas i yefren n lxir deg wulawen n yinelmaden, ad ten–snemreɣ s waṭas ɣef leqdic-agi-nsen, ad snemreɣ imdebbren d yiselmaden n uɣerbaz n yimeɛdar n Uqbu i aɣ-d-yeldin tiwwura i yinelmaden-nneɣ’’, i d-yenna unemhal n uɣerbaz Mass Ifis abdelkade. Afud igerrzen i yinelmaden n uɣerbaz Qadum Malek n Uqbu.
Brahim Benhamouche