Taɣlift n Usegmi taɣelnawt terra lwelha-s deg yimalas yezrin iwakken ad d-tessewjed yiwet n temlilit ɣef uselmed n tmaziɣt deg umalu n tmurt n Lezzayer ladɣa deg twilayt n Relizane. Dɣa d tasweḍt tamatut tabidagujit I yesseddan lecɣal n temlilit-a anda I d-mlalen yimaswaḍen n tmaziɣt ukkud yiselmaden n Twilayin yecban Saida, Chlef, Tlemcen, tissemsilt akked Relizane. Ass amenzu d iɣeblan I d-ttmagaren yiselmaden iɣef yezzi umeslay imi deg temnaḍin-a n tmurt anekcum n tmaziɣt s aɣerbaz mačči d win I d-yemmugren lebɣi. Deg wayyur amenzu, iselmaden rwan amḍerkel, yal anemhal n uɣerbaz ixeddem akken yebɣa. Tagut tettifrir, asalu yerrez, tamacint ters ɣef rrayat. Iselmaden kkan-d nnig n yiɣeblan iwakken ad ṣṣerṣun ajerrid n tuqqna. Deg wass wis sin, tella-d akka yiwet n temsirt n tɣuri I d-tessewjed yiwet n tselmadt deg Relizane. Inelmaden akken ma llan ulac deg-sen win yessawalen tamaziɣt. Maca, kkin akken iwata deg temsirt, ssawḍen ttalsen-d, ttarran-d ɣef yiseqsiyen mebla ma sxedmen tutlayin nniḍen. Yiwet n tsaɛet ideg dehcen aṭas n wid yellan deg tzeqqa n tesnawit Ben Aouda , imi tamehla n Usegmi tesseḥḍer ula d imaswaḍen n tutlayin nniḍen iwakken ad ten-tger deg usenfar-a n useddu n tmaziɣt. Askasi I d-iḍefren d win yerzan tarrayt neɣ tarrayin I ilaqen ad tent-ḍefren yiselmaden n temnaḍin-a iwakken ad sseddun tamaziɣt s wudem usnan. D ayen yeǧǧan ama d iselmaden neɣ d imaswaḍen ad kemmlen amahil ula deg yiḍ iwakken ad d-ffɣen s kra n yiwellihen neɣ ahat tiferkiyin n useddu n temsirin. D acu kan, di yal tiukkelt, awal n yiselmaden yezga itezzi ɣef usbeddi n kra n ttawilat ara yilin deg lmendad I useddu n tmaziɣt. Aḥric agejdan d win icudden ɣer uḥric n tesweḍt imi ulac akka yiwen n umaswaḍ ara sen-d-yilin deg lmendad deg uselmed. D ayen yeǧǧan Mass Ouguellal, s timmad-is d imḍebber deg tesweḍt tamatut ad yessuter seg yimaswaḍen n tmaziɣt yellan deg temlilit-a iwakken ad ttruḥun ɣer twilayin-a iwakken ad d-ffken afus n tallelt I yiselmaden. Seg tama-nsen, imaswaḍen qeblen ad bḍun gar-asen timnaḍin. Iwulem kan ad d-nesmekti dakken imḍebber n tesweḍt d usileɣ deg tmehla n Relizane, Mass Ould Ali d d win I d-yellan deffir uxeddim ameqqran deg temlilit-a, imi ama s tmusni-s neɣ s wallalen, yessaweḍ yessemlal-d wid I terza taluft, aya d ayen I d-yenna fell-as Mass Ouguellal deg wawal-is ɣer taggara n temlilit:”Ḥṣut dakken ma yella nessaweḍ s axeddim yecban wa, tajmilt ad tuɣal I Mass Ould Ali I nufa deg teswiɛt-a.”
M. Smail