I lmend n usmekti n wass agraɣlan n tutlayt n tyemmat, i d-yettilin yal ass 21 deg waggur n furar deg umaḍal, tefugel lwilaya n Tizi Uzzu ttiɛad-a akken ilaq lḥal tikkelt-agi. Aṭas n yidisan i d-iheggan ass adelsan i lmend n usmekti-agi. Gar wid itt-id-isuddsen ad d-nebder: Tanmehla n Yidles, Axxam n Yidles n Tizi Uzzu, tasdawit n Tizi Uzzu, Tanmehla n usegmi aɣelnaw, Taṣweḍt n tmaziɣt… atg. Heggan-d yiwen leqdic d anesbaɣur, i d-yellan ass-nni n ttlata 21 deg furar 2017, deg tzeqqa tameqqrant n uxxam n Yidles Mulud At Mεemmer n Tizi Uzzu. Aseggas-agi, gan-as tajmilt i umedyaz d umussnaw ameqqran Mass Si Mouhand ou Lhocine Sahnouni. Gar wayen i d-yufraren deg wahil yettwaxedmen asegga-agi sɣur yimsuddsen-agi d anesbaɣur,iImi llan-d aṭas n leqdicat idelsanen ɣef teɣzi n wass-nni n 21 deg furar. Ad d-nebder tlata-nni n yisaragen i d-gan kraḍ n yimussnawen d yimnadiyen deg uḥric n tmaziɣt; wigi d Said Chemakh, Hassen Halouan, Brahim Ben Taleb, akked tnagit d ugzul, i d-yefka mmi-s Rachid Sahnouni, i d-yewwin awal ɣef tudert d yimuhal n baba-s. Llant-d diɣen waṭas n temsikniyin, yeεnan tutlayt n tyemmat, am wakken daɣen i d-yella usiken n yimuhal d yirmad n 4 n yiɣerbazen ilemmasen n Tizi Uzzu, wigi d Haiche Hocine, atmaten Qerqach, Tassadourt, d uɣerbaz alemmas Rakem n Tala Amara. yella-d diɣen usenεet n waṭas n tɣawiwin yecban: amezgun, ccnawi, ccḍaḥ d zwağ aqbur n Leqbayel…atg. Mebla ma nettu, asenzi s ubuddu n udlis «Ameslay inna baba», i d-yessuffeɣ mmi-s Racid Sahnouni, ɣer tezrigin n CNRPAH.
Ayen i d-nan
Goumeziane Nabila, d tanemhalt n yidles:
“nga as-agi d asmekti n wass agraɣlan n tutlayt n tyemmat, nebɣa ad d-nsiken i yimezdaɣ n Tizi Uzzu azal i tesεa tutlayt n tyemmat deg uḥraz n yidles d tɣerma-nneɣ. D tamaziɣt i d tutlayt-nneɣ n tyemmat, imi yis-s i d-yettneṭaq ugrud amaziɣ i tikkelt tamezwarut. Nerra diɣ tajmilt i yiwen gar wid i d-yerran tasekla timawit ɣer tira, limer mačči d nutni, tili wis ass-agi ma ad d-nmeslay yis-s…”
Said Chemakh, d amnadi d duktur deg tmaziɣt:
“tajmilt tameqqrant ad tuɣal i UNESCO, imi iga ass agreɣlan i tutlayin akk n tyemmatin n umaḍal. Imi walan belli di 6000 n tutlayin yellan deg ddunit, sya ɣer 2050 azal n 3000 seg-sent ad negrent, amur ameqqran deg-sent d timawiyin. Nutni ḥesben tamaziɣt gar tutlayin i qrib ad suffɣent tarwiḥt, ihi ilaq fell-aɣ ad nseḥbiber fell-as, uqbel ad ifat lḥal. Imi akka tura ddeqs n tantaliyin n tmaziɣt i inegren deg tmurt-nneɣ”.
Rachid Sahnouni, d mmi-s n Si Mouhand :
“nefraḥ aṭas s tejmilt-agi i d-as-yuɣalen ussan-agi iεeddan i ubabat-nneɣ, acku tura netta mačči n twacult-is kan, maca d ababat n Lezzayer merra. Tanemmirt s tussda i wid akk i d-yefkan afus n tallelt, deg tejmilt-agi meqqren, tanemmirt daɣen i yinebgawen n lḥerma i d-yerzan ɣer uxxam n yidles n Tizi Uzzu, ass-nni n 21 di furar 2017. Ssrameɣ imnadiyen d yisdawanen ad qerben ɣer ugerruj i d-yeğğa Si Mouhand, i wakken ad as-xedmen tasleḍt d tezrawin”.
Hassen Halouan, d aselmad deg tesdawit d amnadi:
“d iseɣ i tutlayt-nneɣ n tyemmat, imi ula d nettat tesεa amkan-is gar tutlayin akk n umaḍal .Yal aseggas negrent wazal n 200 n tutlayin, ladɣa timawiyin. Yerrna tutlayt mačči d imeslayen kan, maca d tamuɣli n ugdud-is ɣer ddunit, ɣer talsa…atg”.
Arkoub Abdellah, d amaswaḍ n tmaziɣt:
“d tikkelt tamezwarut ideg ara d nsuddes timlilit yecban tagi deg lwilaya n Tizi Uzzu, imi ḥedren yid-nneɣ yinelmaden n 4 n yiɣerbazen ilemmasen. Nessaram yal aseggas ad nxeddem ugar, i wakken ad nessiweḍ ad d-nsebgen azal n tutlayt n tyemmat deg unegmu n uqcic, deg unegmu n tnefsit-is, n timadt-is…atg”.
Brahim Ben Taleb, d amnadi d amaru:
“ferḥeɣ aṭas s wass-agi agraɣlan, neεreḍ ad d-nesken deg-s i warrac azal tesεa tmaziɣt deg tmetti, imi tesεa amkan-is deg uḥric n uxeddim. Nniɣ-d yakan belli agrud yessnen tamaziɣt, yezmer ad yelmed, ad d-yesusru akk tutlayin n umaḍal”
Ghani Amazigh