Yella yiwen n lqayed d amerkanti, isɛa cci d ayen kan. Isɛa ula d acrik ixeddem fell-as. Iɣli-d di lehlak azal n tlata wagguren. Akken iḥus ḥemmun waman-is, iwweḍ-d wass-is, ikker izweǧ-as i yiwen-nni n uqcic i isɛa. Ixdem-as tameɣra annect-illa-tt : mmezlen yizgaren, ččan medden, tefraḥ yemma-s n uqcic d ayen kan. Yerna cwiṭ kan dɣa yemmut. Mmi-s nni Yufa-d iman-is kullec fell-as. Yiwen wass, ikker-d sbaḥ zik yenna-as deg uqeṛṛu-s wellah ass-a arda ad ffɣeɣ ad lḥuɣ cwiṭ. Iffeɣ ilemẓi-nni, iṭṭef abrid ileḥḥu, ileḥḥu alammi i d-imlal yiwen n umɣar.Yenna-as ilemẓi-nni : ‘’a sbaḥ lxir a baba amɣar’’, yerra-as-d winna: ‘’ssbaḥ lxir d rrbaḥ a mmi ! Anda akka i tettedduḍ tanezzayt-agi ?’’. ‘’Niqal wellah ma nwiɣ ad ak-iniɣ d acu iyi-icuɣben taṣebḥit icban ta ! Imi i yi-d-testeqsaḍ wellah arda ak-in-iniɣ kullec’’, i as-yenna uqcic. ‘’Ini-d kullec a mmi, ad ifsus wul-ik’’, I t-iweṣṣa umɣar-nni. Ilemẓi-nni, iḥka-as tadyant-is, yenna-s: ‘’segmi yemmut baba griɣ-d deg uxxam d yemma, weltma, tameṭṭut-iw d ucrik-nneɣ. Ttbanen-iyi-d am wid ur nebɣi ara ad asen-iliɣ d amsewwaq imi meẓẓiyeɣ. Wa ijebbed wa ikerref. Ugadeɣ ayen akk isbedd baba, ad iɣli deg yiwwas. Yenna-as umɣar : ‘’ruḥ, qeddem ɣer sdat ad teɣreḍ’’. Ilemẓi-nni, ikemmel abrid ɣer sdat, ileḥḥu, ileḥḥu, yufa yiwet n tmeṭṭut tbedd am wakken d netta i tettraju. Tessawel-as-id, tenna-as: ‘’qerreb-d ɣur-i, sɛiɣ yiwen n wawal ad ak-in-t-iniɣ’’. Yuẓa ɣer-s. Tameṭṭut-nni mezziyet mliḥ, tezzyen d ayen kan, d aggur deg yigenni nettat di lqaɛa. Iwweḍ ɣer tama-s, tjebed-it, tzemḍit ɣer yidmaren-is, tettuɣu.
Yettkemmil…
Ramdane Lasheb