Taddart n Ifouzer d yiwet seg 23 n tuddar n tɣiwant n Ait Aissa Mimoun, i d-yezgan deg ugafa n tɣiwant-agi u deg ugafa n lwilaya n Tizi Uzzu. Taddart-agi, mazal ar ass-a n wussan tettidir iseggasen-agi ineggura lexṣaṣ d ameqqran, deg yiḥricen d yisenfaren yemgarden n tudert tatrart gar-asen ; ttawil n Internet, lgaz n temdint, yir liḥala n yiberdan, imḍiqen i yilmeẓyen, d uɣbel n waman tissit, trisiti …atg. Ssuturen yimezdaɣ n taddart-agi n Ifouzer deg yimḍebren teεna temsalt, ama d wid n Usqamu aɣerfan aɣiwan (APC) n Ait Aissa Mimoun, ama d wid n lwilaya n Tizi Uzzu, i wakken ad d-rren lwelha-nsen ɣer taddart-agi yenḥafen aṭas si yal tama. Menbeεd mi ttidiren akka tura deg tegnatin qessihen. Nnan-d yimezdaɣ-is belli taddart-agi si zik tettwaεzel, yerna mazal ar tura tettwaḥqar, acku ulac tadrimt yettwaxeṣen i yisenfaren n unegmu i lfayda n taddart-agi ara yessifsusen taεkumt ɣef tudert-nsen. Yenna-aɣ-d yiwen n umezdaɣ : ‘’taddart-agi akk i d taneggarut deg tɣiwant-a, cukkeɣ deg tmurt n Leqbayel merra’’. Ma d iɣeblan i d-ttmagaren yal ass, ad naf deg tazwara aɣbel n waman n tissit, imi tikwal tteddun-asen-d waman ur nelḥi ara, yettili daɣen lexṣaṣ n waman ladɣa deg tsemhuyt unebdu. Cetkayen daɣen, ɣef uεeṭṭel n uṣiweḍ n lgaz n temdint s ixxamen-nsen, imi ṛwan lḥif ladɣa deg tesmhuyt n tegrest, neɣ deg ussan n ccetwa, imi mazal-asen yiwen n umkan ur d as-xdimen ara lgaz. D ayen i ten-yeğğan ad d-gren tiɣri, yerna ad ssutren deg wid teԑna temsalt gar-asen, imeḍbbren n tɣiwant Ait Aissa Mimoun, d Tanmehla n Imuhal Izuyaz, i wakken ad d-uɣalen ad kemmlen lecɣal-agi n lgaz deg wussan i d-iteddun. Aɣbel wis ukuẓ, d win n yiberdan, imi abrid yeqqnen gar Tizi n Tagouma d taddart-agi n Ifouzer, ha-t-an deg yir liḥala. Azal n sin n yiseggasen segmi i d-ffɣen yidrimen-s, maca mazal ur yettwaxdam ara, imi mazal urεrad kfin asekcem n lgaz s ixxamen. Ugur wis semmus, d win n trisiti, imi ar tura mazal llan yixxamen ama deg tlemmast ama akkin i taddart ur sεin ara trisiti deg yixxamen-nsen. Yella diɣ lexṣaṣ n teftilin n tafat n yiberdan, d tqenṭyar d tregwa i yessuffuɣen aman. Llant tid yettwaxdamen zik, tura ilaq ad ttuεawdent. Llant tid i ilaqen ad ttwaxdament maca mazal ur d-tent-id-εnin ara ar imir-a. Mebla ma nettu uguren-nniḍen yecban, Internet, imḍiqen n wurrar, annar d wayen akk-nniḍen. D annect-agi akk n yiɣeblan i yerran tudert n twaculin n taddart n Ifouzer, ttidirent deg lḥif d lmeḥna, ɣef waya ssuturent deg yimḍebbren ad d-lhin deg wuguren iceɣben allaɣ-nsen, u ad d-afen tifrat i yiɣeblan-agi s tazla.
Adaoun Abdel Ghani