Tameṭṭut tessers-as-d aḍebsi n seksu n yirden s yibawen, terna-as-id tifelfelt taqurant sdat-s. Argaz ixẓer akin akka ssyin inna-as : ‘’ tameṭṭut aɛni ur tessewweḍ ara tasekkurt-nni ! ‘’Ay argaz aɛni turgaḍ, neɣ yella kra i ak-id-ibdan?’’. Yerra-as: ‘’tassekkurt-nni i d-nɣiɣ di lḥara ! Yak d kemm i yi-d-issawlen a tt-an tsekkurt la tkess di lḥara, ddmeɣ-d tamekkḥalt jebdeɣ fell-as teɣli temmut’’. ‘’Ay argaz, ɣur-k wi aɣ-id-isellen ! Ad aɣ-awin medden d awal ! Melmi akka d-ttrusunt tsekkrin di lḥara?’’, i t-tqubel. Tḍeffer-it alammi iskadeb iman-is. Isusem, ičča imensi ssyin iffeɣ ɣer tejmaɛt. Iṣubb-d ilemẓi-nni si tkanna, tenna-as : ‘’yak tesliḍ-d i kullci ?’’, i as-tenna. Ihi, ruḥ kemmel abrid-ik, qeddem ad teɣreḍ. Ilemẓi-nni, iffeɣ seg uxxam-nni ikemmel abrid-is. Ileḥḥu, ileḥḥu alammi yewweḍ ɣer yiwen n uxxam d aɛezzab, teffeɣ-d yiwet n tmeṭṭut tluɛa-t-id tenna-as yya kcem-d s axxam. Ikcem s axxam, iswa lqahwa syin tenna-as ax-n idrimen, ruḥ aɣ-iyi-d tlata kilu n sardin u tɣiwleḍ-d. Ilemẓi-nni, iṭṭef idrimen iruḥ iwwi-as-id sardin. Mi d-yewweḍ urgaz-is, yessendeh-itt ad d-tebru i tyuga. Tebra-d i tyuga ssyin tenna-as taṣebḥit-agi zemreɣ ad dduɣ yid-k ur sɛiɣ kra n cɣel dagi deg uxxam. Argaz yenna-as akken i am-ihwa a tameṭṭut. Ffɣen akken ɣer tkerza. Netta ikerrez, nettat teṭṭeggir deffir-s sardin teqqar-as kan ay argaz la d-iteddu sardin ! Argaz izzi-d ɣer deffir iwala-d d tidet, tameṭṭut-is ad d-tjemmeɛ sardin. Akken iččur ucekkar tenna-as i urgaz-is :’’ay argaz ad uɣaleɣ kan s axxam ad t-sewwaɣ ma ulac ad ixser’’…tettkemmil.
Ramdane Lasheb