I lmend n usmekti n tmenɣiwt n Mouloud Feraoun, tiddukkla yewwin isem-is s lemɛawna n tenmehla n yidles n lwilaya n Tizi Uzzu, heggant-d yiwen wahil d ameqqran ɣef teɣzi n tlata wussan, 15, 16 d 17 deg meɣres-agi deg-i inella.
Deg leqdic-a, ad tili temsikent deg uxxam n Tiddukkla Mouloud Feraoun n Tizi Hibel, timsizzelt n tmaziɣt gar kra n yiɣerbazen, isaragen ɣef tmeddurt d wayen yura Feraoun, asrusu n tmeqqunt n yijeǧǧigen ɣef uzekka-s ass n 15 deg meɣres d wayen-nniḍen.
Tameddurt n Mouloud Feraoun
Mouloud Feraoun d yiwen umaru azzayri, ilul ass n 08 deg meɣres 1913 deg taddart n leqbayel deg Tizi Hibel, taɣiwant n At Dwala deg Tizi Uzzu. Aɣara-ines Ait Chabane. Tella tawacult-is, txeddem tafellaḥt, d tigellilt , d tawacult n tmanya n yiɛeggalen , maca, ddren kan xemsa, Mouloud Feraoun d wis tlata, d aqcic amezwaru. Yunag baba-s ɣer Fransa seg useggas n 1910 armi d aseggas n 1928. Yura Mouloud Feraoun ungal-is amezwaru ‘’Le fils du pauvre’’, deg useggas n 1950. Yeckem ɣer uɣerbaz n Tizi Hibel , deg useggas n 1928, yella deg uɣerbaz amenzu n Tizi Uzzu. Deg useggas n 1932, yetteki deg temsizzelt, yekcem s aɣerbaz n Bouzaréah. Din, yessen Emmanuel Roblès. Deg useggas n 1935, yexdem d aselmad deg taddart-is Tizi Hibel. Yezweğ, yuɣ yelli-s n ɛemmi-s Dehbia yesɛa yid-s 7 n yigerdan .Yebda yettaru deg useggas n 1939. Yewwi ungal-is amezwaru ‘’Mmi-s n ugellil’’ arraz amezwaru deg Lezzayer, u s ungal-agi i swayes yettwassen . Deg useggas n 1946, ceyyɛen-t ɣer taddart-is. Deg useggas n 1952, yuɣal d anemhal deg Larebɛa n At Yiraten. Deg useggas 1957, yuɣal diɣ d anemhal deg uɣerbaz Nador de Clos-Salembier. Syin ɣer-s, yeffeɣ seg tmurt, yuɣal ɣer Lezzayer. Deg useggas n 1951, yemyussan Mouloud Feraoun n Albert Camus. yekfa tira n wungal : «La terre et le sang , yettunefk-as warraz deg useggas n 1953 «Le roman populiste» i ungal-is ‘’La terre et le sang’’. Deg useggas n 1960, yuɣal Mouloud Feraoun d amaswaḍ. Yettwanɣa s yifassen n OAS, ass n 15 deg Meɣres 1962, netta akked xemsa n yimeddukkal-is mi ruḥen ad nejmaɛen. Z.A.Y
Gar wayen yura
Le fils du pauvre, 1950
La terre et le sang, 1953
Jours de Kabylie, 1954
Les chemins
qui montent, 1957
Les poèmes de
Si Mohand, 1960
Journal 1955-1962, 1962
Lettres à ses amis, 1969
L’anniversaire, 1972
La cité aux roses, 2007