Tennerna-d ussan-a deg tɣiwant n Draɛ Lgayed tdukkla tadelsant “Idles”, akken ad tili d aɛwin i yilemẓiyen n temnaḍt, ad tekki deg usawki seg tama n yidles d tmagit. D ayen ara d-yernun ugar n uḥerrek deg wayen yerzan amussu asdukklan, deg temnaḍt-a i d-yezgan s wazal n 70 n yikilumiṭren ɣef waɣir n Bgayet. Dɣa, akken ad yebdu wahil n useggas-a, ad yili warmud amezwaru n tdukkla-a ɣef ddemma n yimeɛḍar I lmend n wass-nsen aɣelnaw i d-yettuɣalen yal 14 di meɣres. Ihi azekka, send taldayt, ad yeqleɛ wahil n usihar-a amezwaru s yiwen n usarag ɣef wayen akk tessran yimdanen-a at asrayen uzzigen. Syin, d akud n usenɛet n yiwet n tceqquft n umezgun akked umunulug i ucmummeḥ. Deffir-s, ad d-ttwasseknent kra n tigawin icebḥen sɣur kra n yimeɛḍar i yesɛan tikci deg kra n taɣulin, gar-asent tamedyezt.Yetturaǧu, daɣen, ad ilin kra n ccnawi sɣur tarbaɛt n warrac inelmaden ɣef wakken i d-nnan yimḍebbren n tdukkla-a, i yessaramen ad yili usurif-a d win ara yeɣren i wiyaḍ meskud sɛan lebɣi. Akken ɣer taggara, ad yekfu wahil n wass s tikci n warrazen i kra n yimekkiyen. Afud igerrzen i tuffɣa-a tamenzut n tdukkla “Idles” deg Draɛ Lgayed. Nessaram, ad tesnerni idles deg taddart-nni, ad tessider kra seg wayen iruḥen. Imi ilaq ad t-id-nini, ma nemmeslay ɣef tutlayt, aṭas i d-ikecmen d tanfaliyin tijenṭaḍin ɣer tɣiwant. M. K.
