I lmend n twinest segmi d-ilul win i d-isellken tutlayt tamaziɣt deg nnger, Lmulud At Mɛemmer, ihegga-d Useqqamu Unnig n Timmuzɣa, s tikkin n waṭas n tkebbaniyin d tdukkliwin, yiwen n wahil d ageɛmir ara idummen s teɣzi n useggas-a n 2017. Ahil i d-yemmugen, yebda yakan seg 28 deg furar yezrin, ar 31 deg duǧember 2017. Ad d-nebder kra n yisiharen seg wayen ara yilin, imi yetturaǧu ad yettunefk d tamsirt uḍris « Tabrat i Muḥend Azwaw » i akk inelmaden n yiɣerbazen ilemmasen d tesnawiyin deg 48 n twilayin. Asmekti d tirza ɣer tesnawit anda yella yesselmad Dda Lmulud. Ugar n tezrawin deg tesdawiyin, ad tili tuzzya taɣelnawt n tmezgunt » Le foehn » seg 10 ar 24 deg yunyu. Akken kra n wussan, ad temmag tuzzya-nniḍen i temkarḍiyin n yidlisen n Dda Lmulud. Deg waya, ad yili yuɣ lḥal usiẓreg d usuqqel n waṭas seg wayen yura. Deg wayyur n ctember, ad d-ttwasuddsent ddeqs n temsikkniyin ɣef umussnaw-a, ama ɣef wayen yenna, yura neɣ inuda. Am wakken ara d-yettwaheggi deg rreḥba n udlis n Lezzayer, seg 31 deg ṭuber armi d 5 deg unbir, yiwen n wahil yettwabudd i Dda Lmulud At Mɛemmer, gar yisaragen, tiɣuriyin, asenɛet n yisura…atg. Deg wussan-nni dɣa, ad tili temlilit tagraɣlant ɣef ubabat n tmaziɣt, s uzwel » Mulud At Mɛemmer, amussnaw yezdin gar tɣermiwin’’. Tettwajerred daɣen i taggara n useggas tfaska taɣelnawt n « Ahellil », d tajmilt i Dda Lmulud, deg Timimun. Ma yella d ayyur-a n meɣres ideg nella, ad yili ttiɛad deg Udrar n Fad i lmend n teẓrigt tis 15 n tfaska n tmedyezt i iḍebɛen s yisem n Dda Lmulud. Dɣa, din ara ḥeḍren d inebgawen at Useqqamu. I usmekti kan, tekki Tdukkla Tadelsant Adrar n Fad deg wahil-a n twinest ɣef tlalit n Dda Lmulud At Mɛemmer.
M. K.