I lmend n umagger n tefsut, Amezday adelsan ussnan CCS n taddart n Yiger Ali akked Umezday n unadi d usekfel n At wnir di tɣiwant n Ferɛun di tama n Bgayet , heggan-d yiwen n wahil d amerkanti êf teɣzi n sin wussan si 17 ar 18 di Meɣres. Ass-nni n n lǧemɛa, teldi temsikent ideg i d-ttusnaɛ-tent waṭas n tugniwin ɣef tguliwin swayes ttmagaren tafsut di temnaḍin yemxalafen n tmurt n leqbayel, ladɣa seksu ifuren ɣef yizẓuran n uderyis. Ɣef lewhi n 14H, yella-d yiwen usarag sɣur Mass Karim Ccix ɣef udlis yura s uzwel «Aderyis». Yewwi-d awal ɣef yimɣi d wazal-is ɣef tezmert n umdan , syin akkin yeldi uskasi ɣef wayen i d-icudden ɣer wansayen n temnaṭ-agi s umata. Ar tagara, yella-d lbiɛ n udlis n umaru s ubudu. Ɣef lewhi n 16h, d asgunfu s yiwet n tceqquft n umezgun i tessuli «Tarbaɛt tiziri» n Tidukkla tadelsant Tifritin. Deg wass wis sin 18 di meɣres, ikemmel leqdic s yiwen n usarag i d-yewwi mass Rachid Oulebsir ɣef tgemmi n yimaziɣen gar zik d tura. Syin akkin, yella-d imekli s seksu d uderyis. Tameddit n wass maḍi, tettusnaɛt-d yiwet n tceqquft n umezgun s zwel «Taxelwit n cciṭan» i d-turar terbaɛt n yinemlayen n Umizur. Ɣer lewhi n tmeddit, ttunefken warrazen i wid iqedcen. Tekfa tmeɣra n tefsut s yisefra d ccnawi .iswi nneɣ : «d aseḥbiber ɣef wansayen d laɛwayed id-ǧǧan yimezwura-nneɣ, iwakken tisutwin id-yettnekaren ad tent-kemlen» id-yenna yiwen uɛeggal n tidukla Mass farid mellahi .
B. Benhamouche