Ass-nni n lǧemɛa 24 deg meɣres deg-i i nella i d-tella tmeɣra tameqqrant n ucennay Ait Menguellet deg tzeqqa La coupole n temdint n Lezzayer tamaneɣt.
Tettuhegga-d tmeɣra sɣur l’ONDA ɣef ddemma n usfugel n 50 n yiseggasen n ccna n unaẓur ameqqran aqbayli Lounis Ait Menguellet. Yebda usfugel n 50 n yiseggasen n ccna seg tzeqqa n Zenith n tmrut n Fransa ass-nni n 15 deg yennayer 2017. Yebda-tt deg Fransa imi ttiɛad n tmeɣra-agi n Fransa yeṭṭef-it acḥal-aya ɣef wakken i d-yenna deg yiwet n tdewwinit i d-yellan yid-s deg uɣmis n La dépêche de Kabylie, anda yella ula d netta d aneɣmas kra n lweqt. Ɣef wakken i d-yenna, diɣ, idrimen akk ara t-id-iṣaḥen deg tmeɣra-agi i yexdem deg La coupole, ad ten-yefk i Tiddukla «El Fedjr» yettɛawanen imuḍan n uxenzir (Cancer). Aṭas i yettraǧun ad d-yecnu ajdid deg tmeɣra-agi, acu kan ur d-yelli kra din imi ɣef wakken i iwala ‘’Tameɣra-agi d asmekti n umecwar-iw n ccna. Ihi, Ad d-cnuɣ ayen iɛeddan, mačči ayen i d-iteddun. D wagi i d ṣwab ɣer ɣur-i. Ad d-geɣ ciṭ n ugzul i wayen cniɣ, ma zemreɣ ad d-iniɣ akka. Axater, ur zmireɣ ad geɣ agzul i wayen akk cniɣ deg yiwet n teswiɛt am ta’’. Ikemmel yenna-d ucennay Ait Menguellet deg wawal-is deg tdiwennit. Akka, ihi i d-tella tmeɣra-agi tameqqrant i iga deg La coupole i yeččuren armi d ulamek. Usan-d ula seg tmura n berra, am Fransa, Beljik, Lmerruk…atg. Zyada ɣef wid i d-yerzan seg yal tama n tmurt n Lezzayer. D yiwet n teswiɛt anda nnecraḥen yimadanen akken iwata : ceḍhen, ḍsan u kksen lxiq imi ḥedren i tmaɣra tameqqrant am ta. Ladɣa wid i t-iḥemmlen u wwin-d amecwar yid-s. Segmi tebda tmeɣra, nutni d asekles n tezlatin i icennu akked ttuṭfa n ttsawir s yipurṭablen-nsen. Tettban-d tafat n wallalen-agi itiknulujiyin atraren am tcemmuɛin i ttecɛalen zik-nni deg usihar yecba wa. Yal tallit s wallalen-is, maca iswi yiwen. Ma ɣef album-is ajdid, yenna-d ad yewjed taggara n yebrir i d-iteddun. Gar yizwilen ara yilin, yefka-d azwel agejdan «Tudert-nni». Ad tili ula tayri deg album-agi imi ad yessekles snat n tezlatin daxel-is, s uzwel «Tajmilt i tayri» ɣef wakken i t-id-yenna. Ad tili diɣ tejmilt i wid akk i t-iḥemmlen, ukud i d-yewwi amecwar s uzwel ‘’Tajmilt i wigad-iw». Ad ikemmel ucennay timeɣriwin-agi ula deg berra n tmurt. tikkelt i d-iteddun ad yili deg Montréal syin ɣer temdint n Lyon…atg.
Hocine Moula