Taggara n ddurt-agi iɛeddan, tella-d tfaska n uderyis deg ulmis adelsan “Hami Arezki Assam” n tɣiwant n Tifra, deg lwilaya n Bgayet. Tameɣra-agi deg tezrigt-is tis setta, thegga-tt-id Tiddukkla tadelsant “Itri n Yiburayen” d tajmilt i tcennayt tameqqrant Nna Louiza. Tedda tfaska-agi ɣef teɣzi n sin wussan, teḍra-d gar 24 akked 25 meɣres 2017. Ass amezwaru, tella-d deg-s tuffɣa n yimezdaɣ n taddart n Yiburayen ɣef 9h, i wakken ad d-gemren u ad d-megren iẓuran n uderyis, swayes ara sewwen seksu n uderyis. Ma ɣef 14h00, tella-d tulya tunṣibt n tfaska-agi, s kra n temsikniyin yemgaraden akked yisenza s ubuddu n yidlisen. Γef 14h30, tella-d tɣuri n yisefra sɣur yimedyazen, azgen n ssaɛa mebɛed, tella-d temlilit d tcennayt Louiza. Seg 17h00 d asawen, tella-d tceqquft n umezgun, sɣur tarbaɛt “Jose Sedouk”. Ma d sendiḍelli 25 deg waggur-agi ideg nella, ɣef 10h00, tella-d yiwet n tqaɛet n ccḍah aqbayli sɣur wat Ukefadu, azgen n ssaɛa mebɛed, tella-d diɣ tɣuri n yisefra. Ma ɣef 11h00, tella-d tukci n yigerdasen n uttekki d usebɣes. Mi yezgen wass, yella-d ufraq n seksu n uderyis i wid iḥedren dinna. Syin akkin seg 14h00 d afella, tella-d tmeɣra meqqren n ccna, ideg ɣennan 10 n yicennayen gar-asen: tin iwumi tuɣal tejmilt Louiza, Farid Ferragui, Karim Khelfaoui, Karim Abranis, Mouh Oubelaid…atg.
Amazigh Ghani