I lmend n 40 n yiseggasen n ccna n unaẓur ameqqran Taleb Tahar, suddsen-d tenmehla n yidles n lwilaya n Tizi Uzzu, axxam n yidles Mulud At Mεmmer n temdint-agi akked umazday n yirmad idelsanen d inaẓuren, ass-nni n sed 25 seg meɣres 2017, yiwet n tejmilt s wazal-is i unaẓur ameqqran n tezlit taqbaylit. Wagi d Taleb Tahar, yiwen gar lecyax deg uẓawan n tmurt taqbaylit. Yella-d leqdica-agi deg Uxxam n yidles Mulud At Mεemmer n Tizi Uzzu. Heggan-d yiwen wahil d anesbaɣur imi sendiḍelli ɣef 10h00 n ssbaḥ i tebda tejmilt-agi s wudem unsib sɣur tanemhalt n yidles n Tizi Uzzu Massa Goumeziane Nabila. Dɣa deg tzeqqa n temsikniyin tella-d yiwet n temsikent n tesfifin-is tiqdimin d imagraden n tɣamsa yettwarun ɣef tudert-is d leqdic n urgaz-agi ameqqran. Am wakken daɣen i d-sneεten yiwen usaru i d-yewwin ɣef tudert n ufennan-a aqbayli aqbur, ɣef 11h00 n uzal deg tzeqqa n umezgun. Ma ɣef 14h 00 d afella, tella-d temlilt d unaẓur d uskasi d tririt ɣef yisteqsiyen n wid akk i t-iḥemmlen neɣ i as-isellen. Tella-d diɣ tnigit sɣur tawacult-is d yimeddukkal-is
A. Ghani