Deg ussan-agi yezrin i d-yeffeɣ wammud n tmedyazt amezwaru n temsiwt Ben Sidhoum Rachida iwumi tsemma “Keltouma, yemma taɛzizt” i d-yeffɣen ɣef ɣer tezrigin «Art Plume» deg n temdint n Tizi Uzzu. D wagi i d adlis amezwaru ara d-tessuffeɣ tnelmadt-agi n tmaziɣt, ideg terra tajmilt i yemma-s s wammud-agi n tmedyazt. Gar yisental iɣef i d-tewwi awal deg udlis-agi n 18 n yisefra, ad naf ukuẓ n tejmilin (tlata i yemma-s, yiwet i baba-s), tagujilt, tamussni, lmektub, tayri, daɛwessu, lefraq, urfan, uguren, lexdaɛ, tudert n tmeṭṭut…atg. Ad d-nesmekti belli tmarut-agi, tewwi-d agerdas n master «Taẓuri d tsekla tamaziɣt», deg taggara n useggas n 2016, seg Ugezdu n tmaziɣt deg tseddawit n Lmulud At Mɛemmer n Tizi Uzzu. Tettheggi diɣen yiwen wungal ara d-yefɣen deg wussan i d-iteddun. Taɣuri igerrzen i yimeɣriyen, afud iǧehden i yimeskaren.
A.A.