Sidi Lḥaǧ Lḥusin seg uxerrub n At Saɛdi, si taddart n Tala Xlil deg lɛerc n At Dwala. Immut baba-s, netta iǧǧa-t-id d amecṭuḥ. Tewwi-t yemma-s ɣer xwali-s ɣer Ɛedni deg Larebεa n At Yiraten. Akken meẓẓi skecmen-t ɣer temɛemmert ad iɣer awal n Rebbi. Si Ɛedni iruḥ ɣer Lmaεetqa syin ɣer Wat Lḥaǧ. Ar taggara, yugra-d di Busɛada. Ilmed settin ḥizeb, ccraɛ n Sidi Xlil yerna tajerrumt d susi. Asmi yekfa almud-ines, ssawlen-as, ruḥen wwin-t-id wat Taddart-is akken ad asen-yuɣal d Ccix. Qqaren-d, netta d axeyyaḍ, ittxiḍi ibernyas, ittawi-d aɣrum-is s tifucal n yiɣallen-is. Mi ara as-awin leɛcur neɣ sadiqa, ittagi ad iṭṭef, iqqar-asen: ‘’Ad awen-ibarek Rebbi n lεalamin, awit-t, fket-t i wid ixuṣṣen, i yigellilen. Reḥmet wid yellan di lqaεa, ad ken-yerḥem win yellan deg yigenni’’. Ttqadaren-t, ḥemlen-t medden aṭas, ttasen-d ula seg tudrin-nniḍen, ttẓallen ɣur-s lǧumueɛa. Yiwet n tikkelt, yiwen si Taddart Ufella iruḥ ɣer Lezzayer, imlal netta d Sidi Lḥaǧ Lḥusin, nsan deg yiwen usensu. Mi d-yennulfa, yezzi-d s axxam si Lzzayer, ḥebsen-t iǧadeṛmiyen n Larebɛa n At Dwala. Nnan-as: ‘’D kečč i inɣan leflani ?’’ Cukken-t netta imi kra n wussan kan uqbel, innuɣ d urgaz-nni immuten. Mi asen-yenna nekk d Ccix Sidi Lḥaǧ Lḥusin i insiɣ di Lzzayer, ulac-iyi dagi di taddart mi yemmut wagi, iǧadaṛmiyen ur t-umin ara. Ur nudan ara ad fehmen, qqaṛen-as kan d kečč i t-inɣan. Ssawḍen-as lexbeṛ i Sidi Lhaǧ ɣer Tala-Xlil, yuli-d ɣer Larebɛa s iǧadeṛmiyen. Yenna-asen: “Ma yella tḥekmem s lḥaq, serḥet-d i leflani, ur inɣi ara. Ad d-cehdeɣ, akken i nensa di sin deg yiwen usensu, deg yiwet n texxamt di Lzzayer”. Iǧadeṛmiyen ɣur-sen lexbeṛ, slan ɣef Sidi Lhaǧ d argaz n sswab i ttqadaṛen medden. Tameddit-nni kan, serḥen-as-id iǧadermiyen i urgaz-nni si lḥebs. Mi immut Sidi Lḥaǧ, ssefran medden fell-as.
A Sidi Lḥaǧ Lḥusin
A ticrurin ubeṛnus
Asmi yella di ddunit
Yekkes-d medden si leḥbus
Mi yewweḍ leɛfu n Rebbi
A-t-an di lǧennet am lferdus
Ramdane Lasheb