Mazal imezdaɣ n taddart n Ayt Smaɛel ttmagaren-d uguren deg kra n yiqeddicen i beɣɣun ad xedmen. Dɣa, tikkelt-a mlalen-d aɣilif ula deg wayen yeɛnan tujjya. Aṭas seg-sen i irezzun ɣer tzeqqa n udawi n Tizwal, imi d tin i ten-iqerben ɣef yisbiṭaren nniḍen, akken yal yiwen ad yefru ccɣel-is i t-yecqan s tazzla, war asruḥ n wakud iḍulen. Ma nemmeslay-d ɣef uḥric n tukksa n tuɣmas ad d-nini ugar n lɣaci i t-iqessden ɣef tmentilt n rrxa. Win i d-iqelɛen tuɣmest sinna ilaq fell-as kan ad ixelles 50 n yidinaren. D ssuma i ttwalin Yismeɛliyen d ulac sdat 800 n yidinaren i d-ssuturen yimsujjiyen n tuɣmas deg yidigan yemgerraden n temnaḍt. D annect-n i yeǧǧan imdanen ttmesbaqen gar-asen d anwa ara d-yekkren-d zik, ad iruḥ ad ijerred iman-is deg wumuɣ n tuṭṭfa n nnwabi. Ɣas ma acḥal-aya segmi d-yella usaḍuf-agi, ileḥḥu akken iwata deg tzeqqa n udawi n Tizwal, maca taggara-a yenneqlab waddad. Acku aḥric-nni n tukksa n tuɣmas ur ixeddem am dima, ur yettili deg wussan i nnumen yimezdaɣ n Ayt Smaɛel. Ssebbat n waya caḍent, yal tikkelt d anta i d-yettlalen ad as-slen yimeẓẓuɣen. Tikwal ad d-inin d akersi n usɛeddi i yettwaɣen, tikwal ulac ilemḍaḍen neɣ d tessegnatin i yettwawaten deg uksum n tuɣmest akken ur yettḥulfu bab-is i lqerḥ…, atg. D timentilin i yeszeɛfen imdanen nezzeh imi ttḥettiment-ten ad d-uɣalen seg ubrid i ten-yewwin ɣer din war ma fran-d ccɣel-nsen. «Kkreɣ-d zik ruḥeɣ ad d-qelɛeɣ tuɣmest, armi rwiɣ araǧu akken i aɣ-d-nnan ur ntekkes ara! Ur iyi-yeɛǧib lḥal imi lweqt i d-qqimeɣ dinna ɣef wulac, tili meqqar farseɣ-t deg leqdic n uxxam». I d-tenna yiwet n tmeṭṭut tasmaɛlit. Llan daɣen wid i isebren i lqerḥ n tuɣmest skud ur ufin asellek. Ad d-nebder kan belli ula d aɣilif n wumuɣ n nnwabi yettekka deg usefqeɛ n yimezdaɣ, imi llan wid i t-id-yettbeddilen ttarran-d ismawen-nsen d imezwura ɣas zwaren-asen wiyaḍ. Ttcerrigen neɣ teffren umuɣ ideg rsen yismawen s uzref, ttbeddilen-d wid i d-uran s lbaṭṭel, mbeɛd yettili unaref n wid i ten-yettawɣen. Acu kan, tessaweḍ tzeqqa n udawi n Tizwal ussan-a iɛeddan ad tefru aɣbel-a n wumuɣ, tettheggi-d win yesɛan amessit (tampon) akken ur izemmer albaɛḍ ad t-id-yexlef amek i as-yehwa. Mazal imezdaɣ ttraǧun ferru n uɣilif wis sin.
Kaisa Khalifi