Kra n wussan kan segmi i d-tlul, thegga-d tdukkla tinmettitadelsant « Asirem n Krun » yiwen n wahil s wazal-is i idumen teɣzi n wass n 21 yebrir i iɛeddan, ilmend n usfuggel n Tefsut n Yimaziɣen d Tefsut Taberkant. Gar wayen i d-yellan, ttwasneɛtent-d tanezzayt timsikknin ɣef yidles d umezruy n umennuɣ amaziɣ, am wakken yella-d usarag sɣur yilemẓi Hebbac Yasin, i d-yewwin awal ɣef tedyanin n tefsut n tmanyin. Ula d tanezzut n ubuddu tettwaheyya-d sɣur Mass Lxeyyer Brahimi, am tannumi-s.Akken i tmeddit, ttwasiwlen-d yisefra sɣur yimedyazen Lxeyyer Brahimi d Ɛezzun Ḥmed. Syinna d tagnit n ccna iwumi fkan nnuba kra n wid iḥeḍren. « Nesɛa yiwen n yiswi seg usnulfu n tdukkla-a, yezdi-aɣ akken ma nella. Ilaq ad d-nerr kra n uḥerrek n leqdic i taddart-nneɣ. Ha-t-an nettwali ula d taɣuri n tutlayt-nsen ur tt-yessin umur ameqqran». I aɣ-d-yenna Ḥalim n Ayt Ɛmer d Ḥmed, anmazul n uselway (vice-président) n tdukkla. Yuɣal yerna-d tiɣri: « Ssarameɣ aṭas ara d-ikecmen d imeltaɣen i tdukkla akken ad neddut lwaḥi i ubaɣur n tmetti ». D aya i yewwi-d ad yili d iswi deg temnaḍt i yenṭerren nezzeh seg yir liḥala tadelsant, imi tezzin wayyuren acemma ur d-yettwaheggay d armud adelsan, seg tmettant n umussu asdukklan.
M. K.